【牛骨熬製超濃茄蓉湯底 牛魔王必試香濃騸牯牛】番茄師兄

茄牛湯麵係港人其中一個熱捧選擇,但你食唔食得出湯底用咩熬呢?喺深水埗新開嘅番茄師兄老闆Matthew就試過好多蕃茄湯麵,但佢話未試過有人好似佢咁用牛骨湯調製茄湯底。咁點解佢用牛骨湯調製呢?原來味道會香濃啲㗎!既然係咁,茄牛湯麵嘅牛肉都要味道突出啲,所以Matthew揀騸牯牛做食材,即係閹咗嘅牛呀!公牛閹割後激素少啲,肉味比平常牛肉濃郁,脂肪分佈都平均啲添。Matthew揀食材咁刁鑽,因為佢十幾歲開始就好鍾意四圍揾好嘢食,自己又鍾意煮嘢食,技術仲好到喺朋友之間客串搞吓私房菜添。問Matthew點解咁勇的起心肝開餐廳,佢話:「我喺銀行做咗十幾成績都唔錯,但到咗呢個年紀(中年)再唔做就冇機會喇。」。咁有熱誠,食過佢嘅茄牛麵都醒神啲啦!

Matthew為咗令大家記實佢哋嘅賣點,牆身畫咗大大個蕃茄同牛牛,等你睇圖都讀到係「茄牛」呀!依家番茄師兄仲係試業階段,菜式同配料都會參考食客意見作出調整。依家有三款麵俾大家揀,米線、日式拉麵同烏冬之中,小編大推烏冬呀!扁烏冬幾彈牙亦好掛湯,配濃郁茄蓉湯真係好夾。每款麵雖然有勁量茄蓉湯底,但會配多瓣鮮煮蕃茄,Matthew話想大家食得健康啲囉。

犇犇有禮(HKD78)有三個牛肉部位:小編最鍾意中間嘅牛面頰,好少地方有得食㗎。肉質腍到好似牛柳咁,但又夾雜住牛𦟌中間嘅啫喱位,爽腍交替嘅口感好正呀!

跟住係港人「飛佛」牛坑腩同崩沙腩,燜得好夠時間,但筋腱依然爽彈有咬口㗎。

鍾意滑蛋嘅朋友就要試滑一滑(HKD48),滑蛋整到好似奄列嘅形狀,但個芯依然嫩滑。牛肉就切薄片,但肉味依然好鮮甜幼滑。

老闆考慮到唔係個個朋友都係食肉獸,有一貝子(HKD68)可以滿足一眾茄迷!打孖上嘅帶子用咗剌身級食材,所以用牛油輕煎表面就得,入面可以保持嫩滑爽口嘅質感。

但貝類先係呢碗麵嘅靈魂呀,係咪覺得呢款胭脂蚌好肥大肉厚呢?但可遇不可求㗎,因為餐廳喺深水埗街市旁邊,Matthew每日都會去睇吓當日咩貝類新鮮,有時係花甲,如果有特別貝類佢會喺Facebook專頁公佈,想食好西就要留意喇!

小編仲要私心推介佢哋自家調製嘅鮮露,麻辣味好出色,一茶匙已經將味道層次提升幾倍。如果想清香啲,原來落百里香都異常地夾喎!

小食都唔馬虎,78度慢煮沙嗲豬腩肉(HKD28)都要慢煮幾個鐘,再煎香少少,口感好爽。加上自製洋蔥沙嗲醬幾惹味,但唔會蓋過其他味道。

連飲品都係自家調製,用料一啲都冇hea你㗎!桂圓紅棗桑寄生茶(HKD18/左)檸檬雪梨露(HKD18/中)信陽毛尖蜂蜜冷泡茶(HKD18/右)睇都睇到幾多料。飲完仲可以加$5買走個玻璃樽,熱水都裝得,好多人都鍾意㗎。

 

番茄師兄
地址:深水埗基隆街255號地舖
電話:9462 1567
營業時間:星期一至日:12:00-15:30,18:00-21:30

You may also like...

Leave a Reply

Your email address will not be published. Required fields are marked *