【灣仔潮食低卡壽司Pizza 海膽小龍蝦西日聯盟】KENKOU

最近喺灣仔活道開咗間新餐廳叫KENKOU,係間Maki Pizza Bar喎,即係食咩?又日又西咁樣?原來賣點就係壽司同Pizza嘅crossover,二合為一即係壽司Pizza,新嘢嚟㗎!

餐廳係一個日本老闆開嘅,店名KENKOU係日文嚟,意思係「健康」咁解,而Maki日文意思代表「卷物」,所以夾埋就係「健康卷物Pizza吧」,成個感覺好後現代好fusion喎。

雖然賣「健康」,但同時都有賣酒㗎,店員話夜晚有唔少後生仔嚟掟吓標飲吓酒咁。佐酒小食都係走健康路線,全部係素食!不過素得嚟好味,口痕食多兩件都唔會太有罪惡感呀。

每款卷物Pizza都係即叫即造,成個薄餅主要由兩part組成,首先「批邊」係用咗青瓜或蟹柳細卷,而「餅底」就係先將紫菜裁成三角形,然後再仔細鋪上壽司飯,再喺上面鋪上滿滿嘅新鮮健康食材。


將壽司做到好似Pizza咁真係好衝擊視覺呀,總共有15款Maki Pizza,每款材料都精心設計過,色彩繽紛令人食慾大增,包你食過返尋味呀!

餐廳仲好貼心咁為客人提供咗比較健康嘅素食選擇,例如呢個大明蝦蘆筍蕃茄磨菇柚子醋汁(HKD58/單點),大明蝦其實係用北海道進口嘅大豆蛋白粉整嘅,食落都幾爽口唔會食到一嚿麵粉咁,口感唔錯!多食大豆蛋白粉可以將體內多餘嘅脂肪融化,仲可以促進新陳代謝添!所以邊個話出街食嘢一定唔健康㗎,喺呢度食嘢分分鐘健康過喺屋企食添呀!

除咗上面嗰款大明蝦蘆筍蕃茄磨菇柚子醋汁Maki Pizza之外,呢個素蟹柳紫菜粟米(HKD48/單點)亦係素食款式!一間餐廳可以包容食素同非食素嘅朋友,老闆真係細心呢!其實素食同肉食都係個人選擇,大家可以和平共處,呢間餐廳就做到了。

另外呢個橫行霸道(HKD118/單點)由三款主要食材組成,睇落去都幾精緻㗎!講明橫行霸道,就梗係有打橫行嘅表表者-蟹啦。分別用咗北海道松葉蟹肉、蟹籽同埋蟹味噌蟹柳撈青瓜,薄薄嘅壽司飯上面鋪滿海量嘅餡料,真係食得超滿足呀!蟹肉鮮甜,有少少海水味嘅感覺,而蟹味噌蟹柳撈青瓜亦相當特別,必試呀!店員建議可以先食咗個卷物先,再將個Maki Pizza成塊攞起食,正呀!店內會有手套提供,咁就唔怕食到成手污糟邋遢啦!

呢個韓國海膽青瓜(HKD138/單點)真係小編嘅真愛呀!大家都知香港食海膽幾貴㗎啦,依家呢度俾晒成板海膽你仲要加埋壽司底都係盛惠138!太抵了吧!開頭覺得以呢個價錢食到成板海膽,味道可能會一般般,加上韓國海膽小編又未食過……通常都係馬糞海膽或者加拿大海膽咋嘛!點知小編咬落去第一啖就feel到要上天堂了!完全唔腥,海膽味香得嚟又唔會話有嗰種苦苦澀澀嘅味道,而且唔會話嚿嚿薄切切,真係鮮甜肥美。鍾意食海膽嘅朋友唔好錯過呀!

另外呢個雙鉗出海(HKD118/單點)用咗小龍蝦,肉質幾彈牙,仲幾鮮甜添!千島蝦膏味噌味道鹹鹹哋,仲有幾明顯嘅蝦味,唔錯唔錯。

全部嘅Maki Pizza都可以跟餐嘅,一般都係原價+HKD20蚊左右,會包埋沙律同埋是日特飲,唔算貴喎,可以一試!比較特色啲有排毒水(HKD28)系列俾大家健康地排毒,分別有香橙、西瓜、青瓜同火龍果,4款口味。小編試咗香橙味,真係幾fresh,而且係無添加糖嘅,酸酸甜甜好開胃呀!

如果一大班人嚟飲嘢傾偈,可以試吓素小食,呢款芥末乳酪球(HKD68)幾特別。同平時食開嘅流心芝士丸有啲唔同,個面係烘過,咬落脆脆哋,香口得嚟唔油膩!

另外素魚柳(HKD78)亦非常出色,魚柳咬落唔會話超假,同個乳酪球一樣唔油但香口,送酒一流喇!

難得又有間創意小店出現,仲可以食得開心又健康,撐唔撐先?

 

KENKOU 
地址:灣仔活道1A號地舖
電話:2947 7333
營業時間:星期一至四:12:00-00:00;星期五至日:12:00-02:00

You may also like...

Leave a Reply

Your email address will not be published. Required fields are marked *