【孖Deliveroo簽約合作 台式小店「請坐」真.復活】食焦

一直好得網民歡心嘅台式小店請坐,近日有好消息公佈。兩位台灣媽媽上月尾已經喺自家專頁出po,留言「尖叫聲!某英國企業看見我和T的外型及臉書人氣與故事,在幾個月的討論後,正式和我們簽約。其實我們連自己都不敢相信會有這麼一天。」粉絲知道喜訊都留言恭喜!等咗幾日,終於揭曉,原來係同外送App Deliveroo合作!

喺網上公佈消息,雖然只得外賣而未有實體店,但係粉絲網民已經好支持!(請x他媽媽的店fb專頁圖片)

用「吃甚麼」呢個名係咪好有親切感?其實即係用返兩位台灣媽媽開請坐之前,第一間店嘅名就係叫吃甚麼!勿忘初衷!(請x他媽媽的店fb專頁圖片)

兩位台灣媽媽今次會喺中央廚房戶戶小廚炮製食物,由Deliveroo外送,暫時服務地區只限銅鑼灣、灣仔同金鐘!粉絲當然即刻支持,仲po埋相出嚟話終於可以食返台灣媽媽嘅味道喇!而兩位媽媽仲隱約透露埋另一個好消息,就係實體店已經準備中,好快面世,至於地點喺邊?好多人都估會唔會開返喺西環!

銅鑼灣、灣仔同金鐘地區嘅朋友,可以率先食到台灣媽媽嘅外賣喇!(請x他媽媽的店fb專頁圖片)

實際行動支持,即刻叫外賣!(請x他媽媽的店fb專頁截圖)

預告埋實體店好快會同大家見面,呢個消息先令人更興奮啦!(請x他媽媽的店fb專頁截圖)

其實當兩位台灣媽媽宣佈會同一間英國企業合作,仲未開估係Deliveroo之前,有唔少粉絲都有留言提醒佢哋今次簽約要睇清睇楚先好,唔好再好似上次咁易信人,最後累埋自己,搞到要停業!講返少少歷史,上次為咩要停業?長話短說,就係兩位台灣媽媽疑似遭到另一位股東侵股,又攞埋請坐個商標,俾人喺尖沙咀開咗間A貨請坐……最後兩位媽媽將西環店無奈停業。

西環請坐,唔止深得街坊歡迎,仲得到埋米芝蓮嘅歡心添!(請x他媽媽的店fb專頁圖片)

A貨請坐又點?有飲食達人出po話經過呢間A貨店,人去店空好似執咗咁款喎,叫大家要留心跟進事件發展。(猛烈南瓜在飯桌fb專業圖片)

兩位台灣媽媽嫁到香港17年時間,由最早期嘅小店「吃什麽」、到西環「請坐」,再到獲米芝蓮美食推介,然後爆出停業風波,期間真係一步一腳印!今次俾Deliveroo睇中合作外賣服務,據兩位媽媽所講,原來係多得一個熟客牽線,呢位熟客就係Deliveroo嘅員工,全靠佢向老闆講咗「請坐」故事而成功拉線!依家難得「復活」,大家有機會食返媽媽味道嘅蛋餅同魯肉飯啦,下一步,梗係盡快開新店,請大家坐坐啦!

兩位台灣媽媽嘅味道終於有得再食喇!(請x他媽媽的店fb專頁圖片)

前員工嘅窩心留言,兩位媽媽收到晒!(請x他媽媽的店fb專頁截圖)

You may also like...

Leave a Reply

Your email address will not be published. Required fields are marked *