【滿記xHello Kitty復刻店 瘋狂打卡又食又拎】滿記甜品

滿記甜品新搞作,啱啱喺銅鑼灣希慎開咗滿記甜品 x Hello Kitty「復刻甜品屋」,由門口到店內再到食物都充滿打卡位。場內設計仲用咗唔少舊香港嘅佈置,好似玻璃樽汽水收納箱、Hello Kitty嘅畫作、紅色吊燈同霓虹招牌等等。Hello Kitty唔單止帶大家返去80年代嘅港式懷舊甜品世界,仲可以跟埋你返屋企,因為滿記甜品有禮物送、有精品買。復刻店做到2019年1月6日,趁期間限定去多幾次啦!

舊式拱門設計嘅門口已經有Hello Kitty喺度迎接大家,不過唔好錯過周邊嘅打卡位呀!

門口旁邊嘅設計都一絲不苛,似唔似坐緊小巴入西貢呢?

店內真係Hello Kitty為患呀,座椅同枱面都佈滿晒,一定俾你影到相呀!滿記甜品仲挑選招牌甜品大改造,配合Hello Kitty造型添!

椰汁芒果糯米飯(HKD99)將糯米飯做成Hello Kitty形狀,你忍唔忍心食呢?!芒果外加咗紅桑子同雲呢嗱雪糕,想酸酸甜甜又得,冰涼滑溜都得。

凍芒果桃膠雪蛤膏(HKD77)用咗訂造嘅Hello Kitty中式燉盅,裝住滿滿嘅香滑桃膠雪蛤膏。芒果片仲切成Hello Kitty形狀,好考工夫呀!

熱食可以試焗蘋果西米布甸(HKD66),焗西米布甸裡面溝咗清甜綿密嘅蘋果蓉,面頭再鋪上厚切蘋果片,灑上肉桂糖粉烤焗,香噴噴引到人流晒口水囉。

細個食咩雪糕會勁開心呢?小編係香蕉船呀!Hello Kitty香蕉船(HKD101)將Hello Kitty同佢好朋友Tiny Chum都擺埋上香蕉船度,感覺有冇特別歡樂呢?

甜品以外可以試Hello Kitty小巴脆多士(HKD99),烘到脆口嘅多士裡面填滿粟米蛋沙律,再用香腸扮車軚,模仿大家坐小巴入西貢,小朋友見到都冧啦。

話明玩復刻,一定要有舊式飲品啦!左邊嘅雪糕椰汁紅豆冰(HKD66)用滿記甜品自家製嘅紅豆沙,要多重工序慢火烹煮,口感幾軟腍;配埋脆餅、雪糕、棉花糖,每一啖嘅味道同口感都可以變化多端呀!

中間係雪糕白牛(HKD66),雪碧汽水加上雲呢嗱雪糕充滿兒時回憶,另外仲加入特製嘅Hello Kitty招牌蝴蝶結造型啫喱糖,懷舊中又有新搞作。

右邊係雪糕菠蘿冰(HKD66),雪糕菠蘿冰配上酸甜嘅紅桑子同菠蘿,味道相對醒神啲,好啱夏天飲呀!

想黐住Hello Kitty?只要飲凍熱飲任何一杯都會送一張精美紙杯墊,總共兩款。送完即止,手快有手慢冇呀!仲唔夠喉?仲有精品俾你買走:

左邊設計簡潔嘅藍邊白底懷舊搪瓷杯連蓋(HKD128),杯身印咗懷舊造型嘅Hello Kitty都幾可愛㗎。

右邊係懷舊瓷碗套裝(HKD188),將七、八十年代港式懷舊風情融入生活之中,係Hello Kitty迷必買之選呀!

仲有陶瓷吸水杯墊 [方形]陶瓷吸水杯墊 [圓形](各HKD58),將滿記甜品、懷舊造型Hello Kitty、復古風味嘅元素都融入陶瓷杯墊,咁靚真係唔捨得送俾人囉。

 

嗱,Hello Kitty「復刻甜品屋」唔係銅鑼灣專利,西貢總店(西貢普通道10號D地下)都一齊變身,西貢嘅朋友唔使專登走出嚟啦。

去呢兩間舖有3點提提大家:

1. 堂食每位最低消費 HKD125(以佔座位計)。

2. 身高1米以下佔座位小童每位HKD60。

3. 每枱用餐時間75分鐘(以入座起計)。

 

滿記甜品de Avenue銅鑼灣店
地址:銅鑼灣軒尼詩道500號希慎廣場3樓317-319號舖

電話:3580 1697
營業時間:星期一至日:11:00-23:00

您也許也會喜歡…

發表迴響

你的電子郵件位址並不會被公開。 必要欄位標記為 *