【能量棒都要揀啱時機食 邊款先係最高能量?】懶健康貼士

要速食又健康,有啲人會揀能量棒(Energy Bar),甚至運動前、中、後都會食返條,貪佢細細條方便快速KO,又可以代替正餐,但係知唔知有冇食啱呢?幾時食先最好呢?

能量棒多數係穀物製品,有啲會加朱古力、堅果或水果,佔最多成分嘅係碳水化合物,分分鐘等於2-3碗飯㗎!其餘係糖分,可以高達40克,差不多等於9-10茶匙糖,所以要小心選擇邊款能量棒啱你需要:

口痕當小食

要揀低熱量同低糖嘅能量棒,不過低極都有限,因為本身能量棒嘅出現就係為咗補充能量所需,但會好過薯片等零食。

減肥

有啲人減肥諗住食少啲就轉食能量棒,但能量棒分量細會吸收得快,好易就會覺得餓就食多啲,反而有增肥危機。

運動補充能量

如果只係運動半個鐘,建議食輕食會比能量棒好。因為半個鐘運動可能未夠時間俾你消耗條能量棒。如果真係想食,可以運動前1個鐘食啲高纖類能量棒,飽肚感會耐啲啲。如果做長時間或高強度運動,好似毅行者、馬拉松、個半鐘或以上嘅劇烈運動,期間食能量棒可以快速補充身體所需,但要注意唔好邊飲運動飲品邊食能量棒,因為糖分一定爆標呀!運動後食含高蛋白質嘅能量棒,大約20幾克蛋白質等於兩隻雞蛋,可以幫助重建肌肉。

今次小編喺超級市場抽樣影咗幾款能量棒,有穀物配堅果、水果、朱古力幾款口味,睇吓每款啱咩時間食啦!

口痕當小食可以揀歐寶Alpen夏日雜果輕量能量棒,因為佢各項指數都偏低,係幾款之中最健康。至於運動方面,如果做輕至中強度運動可以揀NATURE VALLEY天然營養脆條香烘杏仁HEALTH VALLEY有機草莓軟穀物棒ALIVE燕麥朱古力全穀麥果棒,碳水化合物同糖分相對高啲,可以支持身體需要。如果做高強度又長時間嘅運動,期間可以按需要食FITBAR堅果麥纖棒,佢幾乎所有指數都係最高。不過同時都要注意,鈉指數已經係1日所需嘅十分一喇,所以都要補充更多水,幫助排走過多嘅鈉。不過小編對呢個結果都幾O嘴,本身以為有朱古力會最高能量,但反而似係最dry嘅FITBAR堅果麥纖棒先係最高熱量囉。不過咁多款都唔太啱運動後食,因為蛋白質全部偏低。希望幫到大家揀到啱食嘅能量棒啦!

You may also like...

Leave a Reply

Your email address will not be published. Required fields are marked *