【接力吉野家攻陷馬鞍山 瘋狂排隊爭住食爭鮮】食焦

香港人乜都排一餐,今次又排啲乜?估佢唔到係排隊食爭鮮喎!去日本排美登利就話啫!話說馬鞍山一直俾網民稱為「美食沙漠」,最近呢個沙漠真係大起變化喎!繼講咗幾年,經「牛肉飯議員」成功爭取之下,吉野家終於進駐頌安商場喇,試業首日已引來大條人龍,未到五點就賣清晒食物,搞到要落閘走先,唔少網民影晒當日墟冚情景po上網,兩個字,誇張啦!

為咗六蚊一碟壽司就要排到咁,大家忍受到最盡排幾耐呢?(馬鞍山之友群組截圖)

打晒蛇餅,唔講真係唔知係為咗排爭鮮囉!(馬鞍山之友群組圖片)

以為吉野家都夠誇啦,原來只有更誇!輪到爭鮮迴轉壽司出場喇,開咗喺新港城中心,試業期間推出六蚊一碟壽司優惠,一聽到有優惠又平,情況更加一發不可收拾,直頭誇張過排隊買樓喎,現場打晒蛇餅,有網民又將實況po上馬鞍山之友群組,仲寫低「咩事呀?突然覺得馬鞍山變咗鄉下咁,成班未食過壽司。」!

吉野家喺自家專頁嘅宣傳,不過俾網民寸:美食?(吉野家fb專頁圖片)

試業首日情況!(馬鞍山之友群組圖片)

張張長龍相po晒出嚟,網民紛紛留言話估唔到馬鞍山友真係連爭鮮都要排一餐,仲話馬鞍山呢個「美食沙漠」真係絕非浪得虛名,幾乎一面倒話難以相信點解咁都可以排長龍啦!有網友仲話點解喺馬鞍山冇小店可以生存到,咪就係因為幫襯晒呢啲大型連鎖飲食集團之故囉,搞到冇晒小店,係自食其果咁話喎!

馬鞍山人咩事呢句,係連日嚟網友問得最多嘅一句喎!(馬鞍山之友群組截圖)

有咗吉野家同爭鮮嘅馬鞍山,仲係唔係沙漠?(馬鞍山之友群組截圖)

擦存在感梗係緊要,不過諗唔到係吉野家同爭鮮贏咗啫!(馬鞍山之友群組截圖)

邊個最開心?梗係吉野家同爭鮮啦!短短時間已經引晒咁多人捧場,真係唔憂冇生意,只怕賣清貨啫!咁邊個最唔開心?據馬鞍山之友嘅報導,梗係附近嘅食店啦,俾人搶晒風頭喎!好似譚仔就係喇,開喺吉野家樓下,人哋打蛇餅,佢就棟咗個牌話「無需輪候」,好大對比啫!又好似唐記咁,眼見吉野家來勢洶洶,就推出包點減價同埋送蒸包優惠添喇!大家互相出招,搞旺吓個場,其實都係好事嚟嘅!

對譚仔粉絲嚟講係好事嚟嘅,冇人爭勿演懶肉啦!(馬鞍山之友群組截圖)

唐記出招搶客啦!(馬鞍山之友群組截圖)

You may also like...

Leave a Reply

Your email address will not be published. Required fields are marked *