【90後小夫妻開店由零開始 5色漢堡純天然無添加】0pt.10

相信唔少人都有過想開Café嘅夢想,但好多時可能都係得個諗字,慢慢就丟淡咗開店熱情。畢竟喺香港開店難中之難係要捱貴租呀!不過呢,最近小編喺中環就發現一間由一對90後小夫妻開嘅小Café叫做0pt.10。咁大膽喺呢個寸土尺金嘅中環開舖?睇埋落去咪知囉。

0pt.10位於藝術集中地PMQ元創方附近,位置唔算旺,閒日其實都真係幾人煙稀少㗎!所以佢哋就喺附近樓梯整咗個企身黑板,等途人經過都可以知道佢哋位置。

舖頭雖然的的骰骰,不過每一樣嘢都係佢哋親手張羅,感覺好有嗰種小店獨有嘅溫馨感覺。兩口子雖然年紀輕輕,但落起廚嚟有板有眼喎,睇嚟真係好用心經營自己第一間舖呀!

除咗咖啡類飲品之外,仲有呢個比較特別啲嘅特飲㗎!登登登凳,就係玫瑰西米露(HKD40)喇!西米露望落係淡淡嘅粉紅色,加埋漂浮喺表面嘅玫瑰乾花,成功擊中小編嘅少女心呀!

本身西米露係裝喺一個茶壺仔入面嘅,for兩個人high tea慢慢斟出嚟飲,幾有貴婦feel喎。一倒出嚟就聞到超濃嘅玫瑰味,開頭仲驚會唔會超重玫瑰香精味道,但飲落玫瑰味香得嚟一啲都唔誇張,西米露嘅質地比較濃稠,似奶昔feel,加埋西米好fusion喎!呢壺玫瑰西米露分量唔少㗎,大概斟到3-4杯左右啦。

最招牌就係五色Burger喇,店主Sally話最初想做呢個五色Burger,全因為老公Leslie有日搓搓吓包嘅時候,突然諗到加啲顏色落麵包度,跟住又覺得加色素唔太健康,於是就將唔同顏色嘅食物素材加喺製作麵包嘅過程中,五色Burger就此誕生喇!

首先係0pt.10牛肉漢堡(HKD83/set),麵包皮係用咗竹炭去做,食落幾煙韌有咬口,牛肉咬落好多汁好有肉味,雖然分量細咗少少,不過可以一次過試多幾款Burger嘛,一班閨蜜去high tea都係食嘢為名吹水為實㗎啦,分量適中又包30蚊嘅飲品(差價可照價補回)。

日式三文魚漢堡(HKD80),包身用咗抹茶包,食落幾有日式風味㗎!三文魚煎得剛剛好,事關有時喺街食熟嘅三文魚成日會太乾身,成嚿嚡烚烚咁,但係呢個三文魚煎完仲有啲油脂嘅味道滲喺肉入面!

黃金蝦漢堡(HKD87)用咗普通嘅麵包皮,本身鹹蛋已經有好濃嘅味道,冇咩必要再用其他味道嘅麵包去增添層次感。鹹蛋黃同蝦係最重要嘅主角,咬落唔會太油膩,黃金蝦嘅部份做得唔錯,真係有少少食緊小炒黃金蝦嘅正宗味道。最重要係唔算好大份,食晒成個罪惡感都唔會好重呀!

最特別嘅自家製麵包皮莫過於辣雞肉菠蘿漢堡(HKD78),用咗咖喱味嘅包做麵包皮。小編以前都未食過咖喱味嘅麵包,今次第一次試覺得幾驚喜!雖然唔係好濃嘅咖喱味,但都食得出有啲微辣,夾埋辣雞肉同埋菠蘿,match!

最後係泡菜豬肉漢堡(HKD80),一咬落去就覺得將一陣韓味食咗落肚,爽口泡菜配入味豬肉,酸辣味超夠。鍾意食泡菜就不容錯過喇!

問到呢對小夫妻店主,點解店名叫做0pt.10?佢哋就話係代表”0 point 10″,意思係由零到有,到最後可以圓滿完成一件事嘅意思。好似佢哋今次第一次創業,就好似BB仔咁一步步學習,由入貨、落廚到落單都有好多學問;另外數目字0同英文字母o又好似,亦可以解讀為option 10,意思即係想舖頭成為一間提供到好多選擇俾客人嘅餐廳,希望客人食到滿意嘅食物,就算今次唔滿意,可以將意見話俾佢哋知,等佢哋有改善空間。第一次創業落足心機又咁熱血,大家想搵間chill啲嘅Café,可以諗諗佢喎!

0pt.10
地址:中環城皇街17號地舖
電話:6761 2762
營業時間:星期一至日:10:00-19:00

You may also like...

Leave a Reply

Your email address will not be published. Required fields are marked *