【全港最貼地街市西餐 招牌脆皮乳豬浪漫主菜】街霸

通常去熟食市場搵食,離不開去吓茶檔或者夜晚叫返碟小炒咁,你又知唔知喺上環皇后街街市入面有間好講究嘅西式餐廳呢?餐廳名好簡單,就算老一輩唔太識英文都一樣噏得出嘅,就係ABC Kitchen。點解叫做ABC呢?老闆之一Joe就話普遍西餐廳都會有一個好難讀嘅法文或者英文名,佢為咗貫徹比較貼地同親民嘅形象,所以就改咗個係人都識又易記嘅名喇!
Joe同主廚本來喺一間蘭桂坊嘅西餐廳紮根超過10年,​2009年餐廳決定撤資香港市場,所以二人就決定向外闖喇!最初決定走入街市做西餐,除咗租金比較平之外,仲因為喺街市比較少見西餐。Joe笑住話:「冇人做咁我咪試吓做囉!」。人做我唔做,先可以殺出新血路嘛!
唔好以為開喺街市就乜都hea呀,佢哋喺大圓枱鋪上紅白格仔布,擺盤又一啲都唔馬虎㗎,唔係一般茶記咁將啲刀刀叉叉撈埋一齊放上枱就算,而係由店員慢慢逐樣擺好,細節做到足㗎!而且佢哋亦好堅持上菜嘅順序,會依返次序先上餐湯、前菜、主菜最後甜品,唔會出現食完主菜先有湯飲嘅情況。Joe仲話呢啲就係叫做「將架日本車當歐洲跑車揸」,即係街市地方酒店質素啦!小編超欣賞呀!
前菜呢,老闆就介紹咗煎鵝肝伴蜜餞葡萄(HKD128)俾小編,嚿鵝肝超肥美,睇到口水都流埋。講口感之前先考考大家,你哋覺得個細碗仔裝住嗰堆係咩嚟?三、二、一,答案就係蜜餞葡萄喇,開頭小編覺得有點怪怪的,但原來鵝肝+多士+蜜餞葡萄係超級match㗎!好似食Parma Ham一定要配蜜瓜一樣,水果嘅甜香中和咗鵝肝嘅油膩感,一啲都唔會覺得漏,極力推介呀!
主菜西班牙燒乳豬配焦糖蘋果及薯蓉(HKD178)亦相當有驚喜,燒乳豬即叫即焗,皮脆肉嫩。一刀切落去「咔」一聲,勁清脆呀!熱辣辣嘅燒乳豬配酸味味嘅焦糖蘋果汁好夾喎,食晒成碟都唔會膩呀!
呢個顏色咁繽紛嘅蛋糕Pavlova(HKD58)大有來頭呀,相傳佢係為咗紀念一位著名嘅蘇聯芭蕾舞蹈員Anna Pavlova而命名嘅,不過直到依家都仲唔確定真正發明Pavlova嘅係澳洲人定新西蘭人,兩國嘅蛋糕界到今日依然為呢件事爭論不休!講返呢個以蛋白酥為Base嘅蛋糕先,驟眼睇有啲啲似港式傳統生日蛋糕,表面鋪滿生果同忌廉,不過其實佢中間仲有加兩球大雪糕㗎,所以口感超級豐富,而且要快手食呀,唔係會溶!蛋糕邊同埋底都係蛋白酥,甜甜哋又脆卜卜,海綿蛋糕夠晒鬆軟,中間忌廉又滑溜,作為一餐飯嘅完美句號超正!

 

街霸最愛:今集街霸覺得Pavlova係真愛呀!鑑於之前冇喺第二度食過呢個甜品,街霸第一次食嘅感覺幾驚艷,除咗好好味之外,竟然喺街市呢個咁中式嘅地方可以食到咁西式嘅甜品,超有驚喜呀!

ABC Kitchen
上環皇后街1號皇后街熟食市場7號舖
電話:9278 8227
營業時間:星期一至六:12:00-14:30;19:00-22:30;星期日:19:00-22:30

You may also like...

Leave a Reply

Your email address will not be published. Required fields are marked *