【祖傳印尼湯麵有段古 自創邪惡鵝肝煎蛋撈飯】十三姨

以前睇古惑仔有洪興十三妹,依家就有旺角十三姨,不過大家唔好誤會,小編只係介紹大家去食嘢啫!之所以叫十三姨係因為食店主打嘅印尼湯麵,湯底源自店主之一Tina嘅婆婆。婆婆係印尼華僑,家中排行十三,所以店名叫十三姨囉。Tina由細食到大,仲成日用祖傳印尼湯底煮麵招呼朋友㗎。有咩特別?另一位店主Momoko即刻話一定要「盅」,因為啲香料唔盅唔出味呀!但咪以為呢度專賣印尼菜,除咗湯底之外,其他菜式都係按港人口味自創,有啲仲有段故添。

餐廳以中式布置為主,座位闊落,坐得幾舒服㗎。好啦,睇吓佢哋主打嘅兩款湯麵先。

因為直接用上枱嘅湯鍋煮麵,所以好新鮮滾熱辣。十三飛(HKD72)配牛骨湯,師傅飛油飛得幾徹底,口感幾清。圖中幾片大塊安格斯肩胛肉,喺湯麵一煮起就熄火放落鍋灼熟,保持嫩滑口感。仲有肉味香濃彈牙嘅加拿大牛肋條、芽菜、炸乾蔥、腸粉、椰菜、芹菜、日本溏心蛋、芫荽同青檸。麵底係粉絲加米粉,吸湯又唔會過飽。全部加埋有十三樣餸,有肉有菜好平均。平時食溏心蛋多數關心蛋黃有冇過熟,但呢隻一咬落去面頭有啲鹹味,原來佢哋灑咗鹽提升味道,愈食愈開胃呀!

另一款都係用粉絲加米粉做麵底嘅係十三么(HKD66),如果想轉其他麵款都可以同店員講。呢款麵配雞湯,好鮮甜。撈勻個麵之前,先喺唔同位置嘅湯面潷啖湯試吓先,因為配料滲落湯令味道有唔同嘅變化,幾特別喎!餸菜主料有炙燒手撕雞,趁熱食會有輕輕嘅「火」味;同埋自家製炙燒雞叉燒,幾軟滑彈牙,配青葱、炸乾蔥、腸粉、椰菜、芽菜、溏心蛋、檸檬,再加埋甜豉油調味,口感同味道層次勁豐富。小編建議大家可以落啲十三姨自家製青辣椒醬,帶點草青香味,同紅辣椒嘅風味完全唔同㗎!

照顧埋有人唔想食粉麵落肚,任何一款湯麵只要加HKD12就可以改用四款當日嘅時蔬,至於係邊四款就由大廚決定。

飯類方面,老闆娘鵝肝煎蛋撈飯(HKD108)可以話係王牌呀!點解落三大塊鵝肝咁重料呢?原來係因為Tina以前喺火鍋店東來居做嘅時候,收舖就會私下整個鵝肝煎蛋撈飯嚟慰勞自己開心吓,依家推埋出嚟同大家齊齊歎。

鵝肝輕輕撲粉後煎到金黃香脆,但冇特別調味以減輕油膩感,所以冇平時食到嘅咁鹹。

Momoko話撈勻食最正,除咗感覺冇咁膩,軟腍嘅鵝肝加上香脆煎蛋同乾蔥炸蒜,口感層次豐富到小編醒神晒。如果唔捨得撈晒成碗,可以撈一半試試。

手撕雞伴雞油飯(HKD28/細)係另一個受歡迎嘅飯,淋咗雞油嘅飯幾滑,加埋自家調製嘅豉油就更惹味喇。大碗都只係HKD48,好多人嚟食都要睇彩數,試過9點左右就賣晒喇。

下星期一午餐會有新菜推出,黯然雞叉燒飯(HKD49)靈感來自周星馳電影《食神》嘅「黯然銷魂飯」,不過就用雞肉代替豬肉做叉燒。呢個飯嘅雞叉燒比湯麵嘅醃得重味啲,加埋沙律醬同海量木魚絲,好有日式風味。

餐廳仲有唔少懷舊飲品,鮮奶溝忌廉(HKD24/左)係Momoko最愛嘅童年回憶之一。金牛(HKD28/右)就用芒果雪糕加忌廉,都好香甜。另外亦有白牛同黑牛,其實食客如果鍾意將唔同嘅「牛」溝亂配搭都得㗎,只要落單講明就會盡量配合。

 

十三姨
地址:旺角通菜街1M-1T號華發大廈地下C號舖
電話:2885 6728
營業時間:星期一至四及日:12:00-17:00,18:00-22:30;星期五、六:12:00-17:00,18:00-23:00

You may also like...

Leave a Reply

Your email address will not be published. Required fields are marked *