【沙嗲王推動漫新Menu 賣相唔吸引味道伏爆】伏務台

沙嗲王間唔中都會同啲動漫合作出吓啲期間限定新Menu,好似之前試過同《寵物小精靈》、《芒亨》合作過,出啲個樣好靚好精緻嘅主題食物,將飯做成主角樣咁。上次出比卡超菠菜咖喱飯都唔錯,得意又味道都ok;不過今次同《新世紀福音戰士》合作就好似少少出事喎……

先唔講味道,餐牌幾個款式嘅食物賣相都……幾唔開胃喎!尤其左下角個第5使徒白咖喱魷魚飯,面頭隻魷魚大就夠晒大喇,不過真係好似隻怪獸咁、又有少少似蟲。小編舉白旗喇!

平時小編幾鍾意食佢哋個蟹粉豆腐鍋,今次一於試吓呢個第7使徒襲來!紅海蕃茄芝士蟹粉豆腐鍋(HKD88)。聽個名就架勢喇,唔知味道如何呢?

一上到枱小編覺得佢個紅色紅得有少少唔合理。唔係蕃茄嗰種有啲透明嘅紅色,係紅得嚟好假,感覺好似落咗超多色素咁!

原來餐牌張相上面嘅「十字架」係薄餅嚟!呢幾嚿十字架都算正正常常,唔會話有怪味或者質地變咗咁,只係一個十字架形嘅薄餅,合格。

終極Boss就係紅海蕃茄芝士蟹粉豆腐鍋本人喇!聞落去係冇乜味,冇平時食開蟹粉豆腐鍋嗰種蟹香,而且亦唔見蟹肉嘅蹤影,平時食正常版豆腐鍋係會有幾揪蟹肉放喺表面㗎噃!呢個期間限定版只有無盡嘅豆腐,同埋顏色太鮮艷嘅蕃茄……絲?食落口竟然有陣腥味,腥得都幾緊要,一啲蕃茄嘅甜或者酸味都冇,如果我蒙住眼嘅話,唔會知道自己食緊蕃茄鍋囉!至於芝士就聊勝於無,係有少少拉絲嘅感覺,但同樣被腥味覆蓋;豆腐係normal水準,但都俾個鍋嘅汁底搞到好腥,小編接受唔到!

 

小編伏氣:其實賣相唔好都唔緊要!點解可以連味道都咁伏?講真小編間中都會幫襯沙嗲王,餐牌上有嘅嘢基本上我都試過晒咁滯,真係冇乜嘢係伏;點知呢啲期間限定用嚟吸客嘅嘢,竟然會出事!仲要價錢都唔平,88蚊食伏嘢真係有啲肉赤。《新世紀福音戰士》粉絲想試嘅話要三思喇,起碼唔使試呢款,試吓其他喇!

入伏點:沙嗲王
入伏價:第7使徒襲來!紅海蕃茄芝士蟹粉豆腐鍋(HKD88)

中伏by #肥仔文
美術by #車雲
攝影by #肥仔文

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *