【大坑烈女開懷舊麵檔 秘方酸辣粉醒神開胃】前座飯堂

大坑曾經一度係美食地帶,大小餐廳食店林立好熱鬧,但近年慢慢變色,有唔少食店都捱唔住貴租……不過有出有入, 一樣有食店大無畏地立足大坑,小編最近就發現新開咗間幾有feel嘅麵檔喇!

你可能會話,麵檔咋喎?可以有幾好feel?嗱!呢個就係重點喇!由於老闆之一嘅Kaka好鍾意懷舊嘢,尤其係六、七年代嗰種老香港style,所以舖頭嘅格調真係十足《花樣年華》咁,用最經典嘅紅綠配色做餐牌主調,仲特登走去訂造盞霓虹燈,落足本!

當日兩位老闆娘Kaka同Sugar一齊現身,兩位都係烈女性格,清楚自己做緊乜同想要啲乜。通常後生女開舖都係西餐、咖啡店呢啲比較小清新嘅選擇,點解會揀賣酸辣粉呢?Kaka諗都冇諗就話:「因為我鍾意食酸辣粉!」夠晒直接。一句我鍾意然後就向前衝,創業就係要呢股衝勁啦!

「其實最初冇諗住話咩創業嘅,咁我住呢度樓上,有日突然間見到樓下呢個舖位招租,咁同個業主都識嘅,佢又問我做唔做。咁大家都係大坑人,佢又俾到個好好嘅offer,諗諗吓就不如試吓做啦。」落街就開工,上返樓就休息,十足舊時前舖後居嘅生活喎!兩位老闆娘原來仲有正職在身,要兼顧正職同時又要顧住間新舖,不得不令小編佩服!

最招牌嘅酸辣粉(HKD40)!Sugar話呢碗酸辣粉湯底嘅秘方來自一位老師傅,湯底味濃,酸菜分量剛剛好,辣得嚟唔會搶喉,酸辣粉係幼身嘅,質感有少少煙韌,不過如果大家鍾意食超煙韌嘅薯粉就可以加5蚊試吓超寬薯粉。一路食一路忍唔住飲埋啲湯,有種愈食愈開胃嘅感覺呀!

另外阿金紅燒牛肉麵(HKD78)亦相當唔錯,麵有啲似刀削麵,軟韌程度適中,小編超鍾意!牛肉超級腍身,完全唔會食到黐住晒啲牙,唔知以為自己食緊和牛呀,可以話係小編食過最好嘅牛肉麵喎!湯底濃郁,幾有台灣風味。

小食方面,小編推薦麻辣手撕雞(HKD48)。雞絲滑溜,麻辣超香口,做送酒小菜一流!青瓜絲同雞絲分量啱啱好,食落幾fresh幾開胃!

最後呢塊大過我塊面嘅椒麻炸雞扒(HKD38),原塊超大炸雞扒40蚊有找,抵呀!咬落唔會「皮肉分離」,炸雞皮連埋嫩滑嘅雞肉咬落爆晒汁,即叫即炸,鍾意食香口嘢嘅朋友仔咪錯過喇!

小編覺得一間餐廳除咗食物好食,人情味亦係留住食客嘅主因之一。今次嚟到前座飯堂食麵,小編覺得成個環境好舒服,氛圍就同兩位老闆一樣咁free style咁率性,食物又好食。鍾意食酸辣粉嘅朋友不妨一戰呀!

前座飯堂
地址:大坑新村街39號地下
電話:5118 1869

營業時間:12:00-22:00

You may also like...

Leave a Reply

Your email address will not be published. Required fields are marked *