【玩嘢Shake Shake海鮮食過未? 龍蝦鮑魚即淥即搖勁鮮甜】淥易搞

大家食shake shake薯條就食得多喇,shake shake海鮮又聽過未呢?最近喺太子有間主打食海鮮嘅新餐廳淥易搞,參考咗美式Seafood-in-a-Bag嘅做法而炮製成shake shake海鮮包,夠晒玩嘢啦!

店主李先生話自己好鍾意食國內嘅炒小龍蝦,又喺英國食過好流行、由美國興起嘅Seafood-in-a-Bag,於是忽發奇想,不如將兩者結合。

保留咗美國手搖海鮮袋嘅做法,不過就將shake shake醬Cajun(紐奧爾良香料醬)換成香港人鍾意食嘅川式麻辣、港式茄辣、泰式青檸同蒜蓉等4款醬汁。

由於餐廳其中一位股東係做海鮮批發,所以每日都會由鯉魚門入貨海鮮,即日運送。因為經批發商直接發貨關係,所以海鮮價位較平價貼地,好似龍蝦、鮑魚同大蜆等都只係比成本價高少少發售,實行薄利多銷益吓啲食客咁話喎。客人可以先挑選心水海鮮,店員會將海鮮放喺自家熬製嘅魚骨湯內灼熟;而4款自選海鮮shake shake醬就即叫即炒,然後將海鮮放入耐熱度超過200℃嘅膠袋,再倒入醬汁,抽住袋口用力搖勻,焗30秒之後就可以開大餐喇。有得shake又有得玩,好過癮!

Shake Shake海鮮類:每個海鮮袋都可以自選一款醬汁,今次小編揀咗青檸醬,仲可以選辣度。海鮮分別有:波士頓龍蝦(HKD168/一隻)鮑魚(HKD78/四隻)羅氏蝦(HKD68/四隻)帶子(HKD42/兩隻)

波士頓龍蝦蝦膏滿瀉,肉質爽口彈牙,配上青檸醬汁,酸味令海鮮鮮味更為突出。

每隻鮑魚都肥美飽滿,煙韌得嚟仲好有口感添!

Shake shake肉類同蔬菜袋 :呢款就揀咗蒜蓉醬,蒜蓉醬落咗牛油嚟烹調,有牛油香,食落又唔辣。

豬扒條(HKD22/一份)雞中翼 (HKD18/一份),肉類預先醃製,全部醃到入晒味,又唔會好乾!而蔬菜袋就叫咗:粟米(HKD10/一份)薯仔(HKD10/一份)鮮冬菇(HKD10/一份)金菇菜(HKD12/一份),每款蔬菜價錢都唔貴,平平地又可以試到唔同款式。

小編特別推薦粟米,入口爽脆鮮甜,粒粒沾滿蒜蓉醬,味道一流。      

海鮮什錦搞搞麵(HKD78),搞搞麵即係撈麵嘅概念,紅菜頭麵底係自家製作,口感有啲似台灣拌麵,但加咗紅菜頭汁,味道唔算濃郁,但感覺好健康。

呢個海鮮什錦搞搞麵有五款海鮮料:分別有青口、基圍蝦、吊桶、蟹柳同蜆,唔使80蚊就食到五款海鮮料,性價比超高!加埋青檸醬撈嚟食,相當惹味呀!

淥易搞
地址:太子砵蘭街394號地下

電話:2642 7018
營業時間:星期一至星期日:12:00-00:00

You may also like...

Leave a Reply

Your email address will not be published. Required fields are marked *