【餐廳有陣「噏味」好難頂 原條鰻魚飯黐牙又黏口】伏務台

星爺話「做人如果無夢想,同條鹹魚有咩分別呀?」,小編要改改呢句金句喇,因為遇到「令人失去夢想嘅鰻魚飯呀!」。旺角嘅夢想號真係會令人冇晒美食嘅夢想,呢度Lunch食個原條鰻魚飯價錢係幾平,但食完會唔開心囉,嗰種感覺好似去咗地獄,仲講乜鬼夢想吖!

黑玻璃俾人感覺神秘啲,又高級啲,但一入去小編就要揞鼻,因為有嗰種間屋好耐冇人住,又冇透氣嘅「噏」味。坐低大約10分鐘左右,小編個鼻開始被同化。成間舖大約三十幾四十個位,但Lunch時間得一個侍應仲要做埋收銀,所以想有貼心嘅服務唔好期望太高。

講返個飯,等咗大約10鐘就上枱。成條鰻魚差不多18cm長係幾大條;不過色水好似唔多靚,加上條魚個尖尖好似黑炭咁嘅乾柴質感,feel到少少出事喎……

飯雖然唔係珍珠米,但食落都算飽滿。不過勁少汁,食多幾啖都口乾。沙律菜就要先撈勻啲黑醋汁,唔係會食到啲草青味。再近鏡睇睇條鰻魚先:

無論反左定反右,個底都好似浸到霉咗咁,好啦,照入口試味見真章。一食好大鑊!條鰻魚唔係好熱,只係暖暖哋,但小編未試過𡁻鰻魚好似𡁻香口膠咁,會黐牙㗎!再食多幾啖都依然係咁,於是試吓起皮,睇吓係咪魚皮太黏。結果淨食魚肉係冇咁黏,但都係黏嘅……其實個飯嘅重點只係鰻魚,但敗筆就係佢!都唔知係咪翻煮又翻煮,或者擺得太耐所以有黐牙嘅口感囉!如果唔係廚藝問題,就係貨源或保存出事啦,希望餐廳正視吓啦。

 

小編伏氣:其實搵到平嘢食本身幾開心,但如果餐廳因為要平而搞到食物質素咁差就無謂囉!小編雖然唔係鰻魚達人,但鰻魚中伏多數都係唔夠鮮或者鹹得滯,絕冇試過食到黐牙囉。 唔係話六十幾蚊就要食到絕頂好食嘅鰻魚,只係想食物有正常質素啫。如果要再俾機會呢間餐廳,除咗提升食物質素,首先要處理吓餐廳陣「噏」味來源!

入伏點:夢想號
入伏價:HKD66

 

中伏by #為食加菲貓
美術by #車雲
攝影by #為食加菲貓

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *