【紐約名扒房引食肉獸 限定1200g快閃「戰斧牛排」】WOLFGANG’S STEAKHOUSE

小編平時幾鍾意鋸扒,今次就豪一豪,去咗中環都爹利街嘅紐約名扒房WOLFGANG’S STEAKHOUSE食真.靚扒。自從2014年紐約店開張後聲名大噪,開始喺各地插旗,終於喺去年插到嚟香港,而今次創辦人Peter Zwiener仲專誠嚟咗香港店,主持後日起(8月30-31日)一連兩晚嘅Private Dinner,當晚仲會供應產量唔多嘅戰斧牛扒(Tomahawk),千祈咪錯過呀!

嚟得高級扒房,主角當然係靚扒!點解咁肯定係 「靚」扒?其實好多餐廳都係用急凍貨,即使聲稱係來自澳洲、美國定紐西蘭都好,喺搭飛機途中啲肉一早就被「雪死」晒。當然用急凍肉,成本會平一大截之外,仲因為好多餐廳根本冇獨立嘅「恆溫熟成室」,不過WOLFGANG’S STEAKHOUSE儲存牛肉嘅「恆溫熟成室」就會嚴格控制溫度、相對濕度同埋空氣流動。由於熟成嘅過程自家一手包辦,所以可以保證到牛肉質素一定係無得頂。

熟成牛肉嘅方法主要分為兩種-乾式熟成同濕式熟成。呢度採用嘅係天然嘅乾式熟成方法(Dry-aged),餐廳創辦人Peter Zwiener話佢哋堅持保留牛肉最原始嘅味道,絕對唔會過份調味。主張煎好嘅牛肉只用少少盬吊吓味就得,因為一塊好嘅牛扒係唔需要隱藏佢本身嘅味道,而佢就希望將呢種原始嘅美味帶俾香港人。

今次Peter嚟到香港,除咗巡視吓業務,仲會喺8月30同31日搞Private Dinner,到時Peter會同大家一齊共進晚宴,分享關於WOLFGANG’S STEAKHOUSE嘅故事外,秘密武器係經過28天熟成嘅戰斧牛扒(Tomahawk)!個名咁把炮,當然大有來頭啦。牛扒係U.S.D.A Prime等級,質素相當有保證。由於戰斧牛扒產量唔多,所以唔係成日食到㗎!呢個Private Dinner既可以見吓創辦人,又可以食到激罕嘅重量級牛扒,係咪諗起都流口水呢?

介紹吓餐牌先,Private Dinner當晚餐單名為A Night with Peter Zwiener(HKD2288/2人)。呢個價錢包咗Welcome Drink、2款頭盤、2碗湯同埋1200g嘅戰斧牛扒,最後仲有甜品。嘩,1200g喎,標準食肉獸大滿足啦。


頭盤有2個,分別係Beverly Hill Chopped Salad同埋Sizzling Canadian Bacon。比華利山沙律感覺好fresh,同加拿大鐵板煙肉相映成趣,一清一油,唔會話食完頭盤就頂住晒個胃咁,配合得唔錯。煙肉超厚身,油香味超晒班,完全唔係平時食開薄切切嗰種煙肉,咬落口感超豐富,脂肪同埋肉嘅比例啱啱好,微脆嘅外皮超加分呀!

飲完熱辣辣嘅蘑菇湯就輪到主菜喇,主菜當然係Peter至愛嘅肉眼-Tomahawk啦!Peter話牛係愈生愈好食嘅,而上圖所示嘅大約rare嘅程度,Peter話愈raw嘅扒愈食得出本身牛肉嘅質素,唔需要調味或者overcook都好正,不過如果大家食唔慣太生嘅肉,medium rare係一個唔錯選擇!呢塊扒肉質嫩滑得嚟又Juicy,因為經過Dry-aged關係,仲有種淡淡嘅堅果味添!大大份放上枱,夠晒派頭!

另外兩款Sides Dish都係主廚精選嘅款式,分別係German potatoes同Cream spinach。焗薯熱辣辣,加咗洋蔥同埋煙肉碎喺底,啖啖超香牛油味,唔會話焗到乾爭爭;另外菠菜超易入口,完全冇草青味。

小編同Peter言談間得知原來佢以前係一個銀行家,由中學畢業開始一做就做咗十幾年banker。喺人生嘅中段毅然選擇轉行開餐廳,原來係因為同爸爸嘅一個共同夢想,「我同爸爸一直都夢想可以一齊開餐廳,而當我準備要由銀行家嘅身份退落嚟,就覺得呢個應該係我最後嘅機會同爸爸去完成呢件事。」Peter爸爸全名叫Wolfgang Zwiener,所以扒房先會叫WOLFGANG’S STEAKHOUSE。估唔到國際名扒房嘅誕生,背後真係有段古喎,仲要咁溫馨添!

問佢鍾意銀行家定做餐廳老闆?Peter聳聳肩:「兩種身分我都好享受!決定開餐廳嘅時候,其實會沿用返一直以來做銀行家累積嘅商業思維同營商技巧。無論我做邊樣都會灌注足夠嘅熱情落去,我相信呢個亦係WOLFGANG’S STEAKHOUSE可以成為國際品牌嘅原因。」

WOLFGANG’S STEAKHOUSE
地址:中環都爹利街六號印刷行1樓
電話:3990 1646
營業時間:星期一至日:11:30-22:00

You may also like...

Leave a Reply

Your email address will not be published. Required fields are marked *