【黃竹坑地踎泰菜CP值爆燈 滿分青咖喱牛腩撈汁送飯】街霸

暑假唔經唔覺又到尾聲,今日街霸介紹呢間街市餐廳都係啱啱放完暑假喎,就係黃竹坑南朗道街市嘅青咖喱屋!唔好睇個名以為好普通,食物CP值同水準爆晒燈㗎!


環境同一般街市餐廳冇咩分別,最搞笑係每張枱上面都會放一枝假玫瑰花,搞到懶浪漫啫!望住枝花差啲唔記得自己喺街市食緊嘢囉!


其中一道招牌菜就係泰式海南雞飯(HKD48/午市)。呢個海南雞飯無論飯同雞嘅分量都好驚人,2個人share絕對冇問題。雞大嚿得嚟皮嫩肉滑超新鮮。唯一美中不足就係當日油飯賣晒,如果唔係就perfect喇!


啲雞賣相真係超靚仔,嚿嚿都油光十足,大件夾抵食,女仔食真係可以帶定個盒打包一半食多餐,CP值爆燈!

食泰國嘢又點少得泰式冬蔭功湯(HKD58/細)?又係超足料,大蝦大隻又新鮮,再望吓啲湯,唔係水汪汪㗎!海鮮同香料嘅精華喺晒湯入面,每啖超香濃惹味,送飯啱晒!順帶一提,呢個湯幾辣吓,唔太食得辣嘅朋友可能要問吓店員有冇得小辣喇!

話明係青咖喱屋,點都要試「青咖喱」啦!泰式青咖喱牛腩(HKD68)必食呀!又係超大份,咖喱味道濃而不鹹,唔係好食得出味精咁。撈汁送飯是常識吧,唔怕同你講,街霸食呢碗咖喱食到問店員加飯……你就知道呢個汁真係出事喇!好味到停唔到口,牛腩炆得夠晒腍,完全唔使用牙「齒」開啲肉搞到攝晒落牙隙咁,又夠晒入味。呢個我俾滿分!

食到有啲口渴,叫咗呢杯番石榴沙冰(HKD30)。由食物到飲品嘅分量真係從一而終咁……大份。呢杯沙冰大到嚇親我,凸咗出嚟嘅沙冰同杯裡面嘅分量差唔多,即係等於一般餐廳分量嘅double喎,30蚊真係超抵囉!味道甜得嚟唔係糖漿嘅假甜,係番石榴本身淡淡嘅果香味。唯一有啲無奈係實在太大杯,飲得唔夠快就會瀉出嚟,所以店員事先已準備好一隻碟仔,等你唔使流到周圍都係,都幾貼心嘅,哈哈!

街霸最愛:其實今集真係難以抉擇,不過必食嘅係青咖喱牛腩同埋番石榴沙冰。街市都食到高級泰菜嘅水準,價錢仲要超親民貼地。如果2個女仔去食,嗌一個飯一杯沙冰加個小食已經夠飽!無錯,連嘢飲都淨係叫一杯好喇……街霸上次同朋友一人一杯真係飲唔晒㗎!

青咖喱屋
地址:黃竹坑南朗山道熟食市場1樓5號舖
電話:6273 2861
營業時間:星期一至五:11:45-14:30;18:00-22:00;星期六:不定

You may also like...

Leave a Reply

Your email address will not be published. Required fields are marked *