【新口味月餅有鹹有甜 早鳥優惠最後召集】月餅

一年容易又中秋,再唔買月餅就miss晒啲優惠喇!今年唔少品牌都推出新口味搶灘,好似今次為你介紹嘅法式甜品店、韓國雪糕品牌、傳統老字號同手工小店等分別推出咗11款鹹、甜月餅,有果味、軟心忌廉奶皇、朱古力味同咖啡味等等。就算唔為應節,都好應該買盒獎勵吓自己同身邊人,甜甜蜜蜜過中秋啦!

 

法式甜品店 PAUL LAFAYET

講開PAUL LAFAYET就會諗起佢嘅法式焦糖燉蛋同馬卡龍,但原來法國人喺喜慶日子或親友聚會都會整新鮮水果餡餅或應節嘅批餅,所以今年佢哋嘅法式月餅靈感就來自“Tartelette”(法文解餡餅或批)。

PAUL LAFAYET秋月法式月餅禮盒(HKD320/4件)全人手烘焙,鬆化嘅批餅包住手工製作嘅新鮮餡,經過複雜工序再風乾24小時先有得食㗎!一盒有四款口味,睇吓邊款啱你:

左上:清香玫瑰荔枝用法國荔枝做內餡,面頭再灑上可食用嘅玫瑰花瓣,兩種唔同嘅清香,令舌尖有淡淡香甜。

左下:醇香抹茶揀咗日本靜岡縣高海拔地段嘅抹茶粉,因為日照時間短啲令茶葉甘而不澀,茶香都醇厚啲,抹茶控要搶住食啦!

右上:濃香榛子朱古力嘅榛子同朱古力都係法國進口㗎。脆口榛子配上質感幼滑朱古力已經好誘人。面頭塗一層牛奶朱古力,再灑埋餅乾脆脆,口感層次由內到外變變變!

右下:甜香杏仁黑櫻米以人手將黑櫻米混合杏仁碎,再喺紅色餅皮灑上金黃色嘅桂花,令果甜增添一份清香氣味。唔知呢個配搭係咪參考咗桂花糕呢?

月餅禮盒全線PAUL LAFAYET分店發售,由即日至9月5日期間購買禮券或現貨仲有9折優惠添。

 

韓國雪糕店 百味堂

百味堂出名嘅係雪糕,但咪以為佢出雪糕月餅喎。今次參考香港人鍾意嘅口味,推出限量軟心忌廉奶皇月餅呀!


限量推出600盒嘅軟心忌廉奶皇月餅(HKD498/6件)新鮮手製,包裝盒同餅皮壓上品牌代表嘅「百」字。月餅奶黃餡特別加入由韓國直送嘅忌廉,質感幾幼滑。8月31日或之前,去希慎廣場、海港城店買餅禮盒都有85折優惠。

 

40年老字號 翠亨邨

翠亨村係香港自設餅房嘅老字號,雖然佢嘅雙黃白蓮蓉月餅年年都熱賣,不過都搞搞新意思,首度推出冬薑紅蓮蓉蛋黃迷你月餅,搭配過往受客人喜愛嘅有機黑白芝麻蓉蛋黃迷你月餅組合成「花好月圓」雙口味迷你月餅(HKD328/共8個裝)

冬薑紅蓮蓉蛋黃迷你月餅味道清甜中帶啲辛辣,感覺暖胃啲;有機黑白芝麻蓉蛋黃迷你月餅用有機Tahini白芝麻油同自家炒製嘅黑芝麻醬作餡料,即使兩款口味都內藏金黃香滑嘅蛋黃都好似健康少少。8月31日前喺網站預購低至接近65折,9月19日前預購就接近75折,過咗就變返正價喇。

 

本土Cafe HABITŪ

HABITŪ呢個本土品牌喺過去14年致力塑造咖啡潮流,今個中秋仲宣揚公平貿易同本地女性平等工作機會添。HABITŪ 首次同「細味公平」合作,以公平貿易原材料製作獨家口味中秋月餅;而製作月餅嘅「師傅」好特別,係一班葵青區街坊婦女呀!佢哋咁有心,你又支唔支持呢?

 

細味公平月餅禮盒(HKD268/4件)有兩種味,左邊台灣八卦山土鳳梨月餅首次採用台灣八卦山嘅土鳳梨做餡料,香甜味美;右邊係「細味公平」獨創新口味健營紅菜頭咖啡月餅,用兩款公平貿易原材料:有機咖啡同巴拉圭原蔗糖焗製。8月31日或之前網上預購就有85折,詳情留意佢哋Facebook專頁啦。

 

本土手工朱古力 Patelly

Patelly由一位90後Pathon創立嘅本地手工朱古力品牌,開業一年首次挑戰做朱古力月餅,三款口味有鹹有甜。Pathon唔單止喺味道上花心思,面頭嘅花樣設計仲參考梵高嘅 The Starry Night 《星夜》畫,再加入花好月圓嘅概念人手畫喺面,每個月餅都獨一無二㗎!雖然佢冇早鳥優惠,但都限時訂購!只接受網上或電話預訂,最後預訂日期延長至9月10日,詳情可以留意佢嘅Facebook專頁。凡買任何三盒或以上可送貨上門,唔夠就會同你預約交收攞貨。

紫月(HKD280/4件)嘅朱古力外殼係62%秘魯朱古力,微微苦令整體感覺唔會太甜。入面有兩層餡,底係鬆軟嘅燕麥蛋糕,面係酒香軟心朱古力加入法國冧酒㮛子,有啲果肉同酒香,令味道層次更豐富。

藍月(HKD280/4件)就將軟心朱古力轉做果香軟心朱古力,加入法國什錦蜜餞果皮,其他都同紫月一樣,口味相對大路啲。果香味濃,仲有少少回甘添。

一口金月(HKD250/12粒)係鹹味款式,一口一粒。62%秘魯朱古力外殼包住特製豬肝醬,幼滑嘅豬肝醬混合特製香料,食落比較鮮味,再混入自己焗嘅脆脆加強口感層次。

You may also like...

Leave a Reply

Your email address will not be published. Required fields are marked *