【過江龍老字號定街坊店? 精選四大人氣越式生牛河】蔡瀾Pho、錦麗、香河越南餐廳、越軒牛肉粉專門店

泰國菜招牌係冬蔭功湯、新加坡係肉骨茶、台灣就係魯肉飯,咁越南菜招牌又係咩?梗係一碗令人回味嘅生牛河啦!最近一窩蜂咁開咗唔少越南菜餐廳,要試到餐廳嘅真功夫掂唔掂,生牛河自然係最好測試喇!要做到一碗好味嘅生牛肉河,湯底除咗要鮮甜濃味,牛肉更加要做到粉嫩幼滑,肉、湯、河、香料,每樣配合得天衣無縫先令人清晒成碗!點先食到一碗高質生牛肉河粉?今次小編集合咗四間唔同風格嘅越南餐廳,有新有舊、每間各有真功夫!

明星效應   蔡瀾Pho

蔡瀾曾經講過:「天下間喜歡吃東西的人,最終都會愛上一碗越南牛肉粉。」,所以佢行勻全球,喺墨爾本嘅勇記揾到最好食嘅越南粉帶俾大家。有勇記秘方,又有自家研發嘅河粉機,加上八成食材由越南同澳洲進口,蔡瀾Pho門面寫住「一生難忘的越南粉」,真係對自家出品好有信心咁喎!

生牛肉湯河粉(HKD88)有6-7片肉左右,湯好熱,影多幾張相就浸熟咗啲肉,想食到嫩啲嘅質感就要快手喇!

河粉機每日新鮮製作薄薄嘅越南河粉。由浸米、石磨磨成米漿再蒸熟、切割都係自家製作。河粉係小編食過之中最薄嘅,少少易斷啦,但真係幾爽滑㗎;而湯底就非常清澈同鮮甜,係有少少油嘅,如果加上附有嘅青檸汁同辣椒,味道會變得醒神,但要小心咬到辣椒會想噴火呀!另外仲有一杯芽菜同香菜都係俾你隨心加料,想食重味啲又得啫。

蔡瀾Pho
地址:中環威靈頓街15-25號UG樓
電話:2325 9117
營業時間:星期一至日:10:00-22:00

 

越南過江龍   錦麗

本身有接近50年歷史嘅錦麗喺越南好出名,最高紀錄試過一日賣出過三千碗牛肉粉,深受當地客人同遊客歡迎,更被《華爾街日報》評為「胡志明市最好吃牛肉粉」,唔怪得上年登陸香港開分店之後,經常都要大排長龍,仲有唔少星級名人食過都讚口不絕,係咪真係咁好食?等小編試吓啦!

錦麗生牛肉粉(HKD60),枱面印有一張越南粉食法嘅教學貼紙,依照指示嚟食,先飲一啖充滿濃郁牛味嘅熱湯,再將九層塔及香葉撕碎放入湯中,之後再加青檸汁、辣椒同芽菜拌勻,最後將粉同湯一齊放入口中,每一啖都充滿住濃郁嘅牛湯味,又真係幾正喎!湯底濃郁鮮甜,生牛肉軟腍幼滑,重牛味之餘亦鮮味十足。攻港短短一年時間,先後喺港九新界開足六間店,犀利呀!

錦麗(銅鑼灣店)
地址:銅鑼灣告士打道280號世貿中心3樓P311號舖
電話:2777 5388
營業時間:星期一至日:11:30-22:00

 

40年老字號   香河越南餐廳

港島區朋友仔,實知老字號香河越南餐廳。創辦人係越南華僑,因為一直鍾情越南粉,咁啱拍擋又曾經喺越南做過生牛河,所以就引用咗佢嘅配方,嚟到香港開越南餐廳,一開就開咗接近40年,因為味道較為傳統,除咗多香港人食,亦係唔少越南華僑嘅開飯食堂。

生牛肉河粉(HKD50),一碗生牛河會附上青檸同辣椒粒,想加薄荷葉、生芽菜同九層塔,就要問店員先有得加喇,唔使加錢嘅!生牛河一放上枱,已聞到陣好香嘅牛湯味,飲落口諗住會好濃郁,較為重口味,點知味道完全相反。負責人Rita話,原來係因為老闆娘本身唔鍾意重口味,希望啲湯以清甜為主,所以湯底只係用洋蔥、香料同牛骨嚟熬煮,所以湯底清甜又帶有淡淡嘅牛味,一啲都唔油膩!

牛肉真係超級大塊!差唔多有成半個碗咁大,生牛肉再浸一浸熱湯之後,肉質變到好粉嫩,一啲都唔會過老,配埋啖湯一齊飲真係牛味十足!Rita仲話其實加半嚿青檸汁同幾粒辣椒落去,已經好夠味,香葉唔需要加晒落去,只要加少少,調吓味咁先係最好食!每一條河粉都沾滿晒湯汁,變得更滑溜!

香河越南餐廳
地址:銅鑼灣波斯富街89號
電話:2576 2240
營業時間:星期一至日:12:00-23:00

 

親民價益街坊   越軒牛肉粉專門店

越軒牛肉粉專門店喺大角咀,位置雖然較為隱密,不過一樣有班熟客仔識路捧場!小店想做到好似快餐店形式嘅越南餐廳,提供大眾化價錢,走親民路線!老闆曾小姐本身係越南食品批發商,一直都覺得越南菜好有特色,既然有食材喺手,因利乘便點解唔試吓自己開返間越南菜?坐言起行,短短半年已成功開分店,係有實力嘅!

生牛肉湯粉(HKD43),青檸、辣椒粒同薄荷葉會另上,客人可以按口味而添加配料。呢款湯底較為特別,除咗用牛筒骨同牛骨去熬成,仲會落埋雞骨,師傅話咁樣可以令湯底味道更濃厚,起碼要熬7至8個鐘,少啲心機都唔得。湯底絕對冇添加任何牛精同味精,就咁睇好似好油膩,不過飲落口好順滑,其實先係精華所在,濃香而不油膩。為咗呢個湯底,師傅前前後後改良咗不下20次,雖然好多食客都話好味到要飲晒啲湯,不過師傅好謙虛咁話,會一直做、keep住進步,繼續改良出最完美嘅味道同湯底。依家仲有下午茶85折優惠,連埋飲品埋單唔使40蚊就食到碗足料生牛河,真係益街坊大平賣呀!

師傅特別教路,生牛河一上枱,牛肉大概浸熱湯涮三秒就食得,咁樣嘅肉質先最鮮嫩,唔會老呀!

越軒牛肉粉專門店
地址:大角咀鐵樹街4號富多來商埸第1期地下16號舖
電話:3618 7465
營業時間:星期一至日:11:30-22:00

You may also like...

Leave a Reply

Your email address will not be published. Required fields are marked *