【世界十大最有營養食材 杏仁冠軍連肥豬肉都入選】懶健康貼士

要介紹食物就要開心share,通常離不開四大類:第一係抵食名單;第二係邪惡美食;第三係健康營養食物;第四係伏食。今次小編就要share最近熱話嘅「世界十大最有營養食材」!話說科學家對1000多種食材進行分析,再列出營養分,分數愈高排行就愈高啦。咁可以食幾多?報告都有計埋大家關心嘅卡路里(每100克分量計算)㗎。消息由BBC中文網報導之後,好多人都主力講「肥豬肉」入選排第8,但就勁少提其他入選食物喎。事不宜遲,等小編話你知!

第10位 鯛魚(Snapper) | 100卡路里 | 營養分:69

鯛魚係海魚,低脂高蛋白質,仲有豐富維他命B3,有助改善消化不良同疲勞等情況。

第9位 甜菜葉(Beet Greens) | 22卡路里 | 營養分:70

甜菜葉有豐富嘅鈣、鐵、維生素K同維他命B雜。其中維他命B2特別多,對舒緩眼睛疲勞有幫助,都市人成日對住電腦同電話真係要食多啲啦。

第8位 肥豬肉(Pork Fat) | 632卡路里 |  營養分:73

令人跌晒眼鏡嘅肥豬肉都入到十大呀!原來佢有多種礦物質來源同維他命B雜,仲有不飽和脂肪添,比肥羊肉同牛肉更加健康。

第7位 莙薘菜 | 19卡路里 | 營養分:78

莙薘菜即係瑞士甜菜,味道有啲苦澀,但營養價值好高。有少見嘅甜菜素同植物生化素,對抗氧化有幫助;另外有大量維他命A、C、鐵同鈣添。

第6位 南瓜籽(Pumpkin Seeds) | 559卡路里 | 營養分:84

種類方面都包括其他南瓜(Squash),係最多鐵同錳嘅食材之一,對男性前列腺同調節血糖有幫助,亦對糖尿病患者有益嘅食物。

第5位 奇亞籽(Chia Seeds) | 486卡路里 | 營養分:85

奇亞籽可以話係熱門嘅養生食品,有大量纖維素、蛋白質、a亞麻酸、酚酸同維他命,而當中嘅脂肪酸有助降低膽固醇。

相關食譜:【冇熱水都沖到麥皮 1分鐘學識減脂組合】

第4位 比目魚(Flatfish) | 70卡路里 | 營養分:88

比目魚有豐富維他命B1,主要令電解質順利通過神經系統同肌肉細胞而正常運作;同時亦係輔助酵素,幫助消化碳水化合物。

第3位 海鱸魚 | 79卡路里 | 營養分:89

海鱸魚係深海魚,擁有高蛋白,但亦有低量壞脂肪「飽和脂肪」,係增加患上冠心病風險嘅脂肪,所以唔好見到營養分高卡路里又低就狂食呀!

第2位 番荔枝(Cherimoya) | 75卡路里 | 營養分:96

番荔枝嘅糖分、維他命A、C、B1、B2同鉀都高,而且唔少科學家研究指出,番荔枝嘅萃取物可以有效對抗12種癌症嘅惡性細胞,當中包括結腸癌、乳腺癌、前列腺癌、肺癌同胰腺癌等等,係好好嘅保健食物。

第1位 杏仁(Almonds) | 579卡路里 | 營養分:97

杏仁有大量單不飽和脂肪酸,可以降輕度升高嘅血脂,幫助保護心血管。

 

講咗咁多,雖然肥豬肉打入營養榜,但佢嘅卡路里始終係頭10名中最高,有營養都唔可以過量。其餘分別有6種植物同3種魚類,都係另一個數據反映四腳動物嘅肉未必係最好,唔知你會由「大魚大肉」變成「大魚少肉」呢?

You may also like...

Leave a Reply

Your email address will not be published. Required fields are marked *