【搲200隻雞翼甩底事件 科大生道完歉再惹風波】食焦

又發生大學生訂咗食物臨時取消事件喇,仲要呢單風波愈搞愈大添喎,幾日嚟喺網上都有新發展囉!今次出事嘅係科大生,搞迎新營想搵人贊助食物,於是搲咗一間西貢賣炸髀嘅小店,要人200百隻雞翼……事情嘅發展都係預咗衰嘢喇,一句sorry同cancel就冇晒影啦!

咁200隻雞翼嘅下場如何?唔會嘥嘅,老闆分咗俾西貢嘅街坊同附近舖頭嘅店主囉!(髀魔-雞髀第一店fb專頁截圖)

小店老闆最初諗住幫吓班大學生,結果好人難做!(髀魔-雞髀第一店fb專頁截圖)

迎新營嘅贊助計劃書,據老闆所講,最初班學生嘅態度都已經唔多禮貌㗎喇!(髀魔-雞髀第一店fb專頁截圖)

咁又係一如所料,小店老闆梗係放上網呻啦,老闆話明唔係為咗要公審班學生,而係想佢哋反省吓連對人嘅尊重都無,咁樣點得㗎!呢個po一出就群情洶湧,真心又好假意又好,班學生都即刻做嘢,又係去小店度當面謝罪耍冧啦!

網上咁大反應,科大仔先知瀨嘢,急急補鑊梗係要出返個道歉聲明!不過其實都太遲喇!(冰川fb專頁截圖)

老闆就話班學生去埋舖頭道歉有足夠誠意,佢都接受咗道歉喇,希望大家都正能量啲啦!(髀魔-雞髀第一店fb專頁截圖)

咁有道歉都好過乜都唔做嘅!(髀魔-雞髀第一店fb專頁截圖)

咁呢個道歉,小店老闆都收晒貨,又開多個po出嚟話希望件事告一段落,佢話班學生真係好有誠意咁道歉,老闆希望大家唔好再追擊佢哋喇!以為暫時平息咗呢個風波啦,點知又有新發展,忽然喺網上瘋傳咗一大段留言,有人幫班學生出頭,反鬧間小店,最惹眾怒嘅一句,就係話「你贊助我就一定要」,再度搞返㷫件事,其他網民大鬧呢個留意者,仲話佢係班科大生嘅分身!

以為告一段落,原來又有人再惹風波。(髀魔-雞髀第一店fb專頁截圖)

明知民意唔係咁諗,呢位「科大生」偏要唱反調,結果又引嚟圍攻!(網上截圖)

其實大學生嘥嘢不時有發生,(重溫相關新聞:https://goo.gl/HTvfbs ),不過通常情況係道歉了事就完咗,估唔到今次一波未平一波又起啫!呢次雞翼事件繼續發酵,科大仔見到有人咁樣留言鬧小店,亦都即刻劃清界線,涉事嘅學生會「冰川」就聲稱留言嘅人唔係佢哋學生會嘅人,與「冰川」冇關,不過就承認咗係另一個Hall嘅科大生!

「冰川」即刻澄清唔關佢哋事,不過都有網友入埋佢哋數㗎喇!(網上截圖)

最好嘅總結應該係呢句喇!(髀魔-雞髀第一店fb專頁截圖)

You may also like...

Leave a Reply

Your email address will not be published. Required fields are marked *