【貓店長坐鎮老蘭點心舖 黑松露蝦餃Fusion配對】優點心

唔一定要喜愛夜蒲先去蘭桂坊嘅,其實老蘭一直都有唔少好嘢食喇!今次小編就帶大家去蘭桂坊食中餐,仲要係中,式,點,心!

呢間優點心選擇多得嚟仲好創新,事關老闆娘Katie覺得傳統點心大家由細食到大都有啲悶,佢話:「既然舖頭開喺蘭桂坊呢個比較多後生仔幫襯嘅地方,不如索性搞啲Fusion嘢啦!我久唔久就同師傅度吓啲新花臣,師傅本身係做開傳統點心嘅,不過佢都好肯陪我癲。」。

首先上枱係玫瑰花咖喱魚蛋(HKD35),聽落真係……好特別喎。未食落口就聞到陣陣玫瑰花香,不過食落又覺得意外地好食喎!淡淡花香味令咖喱冇咁膩,咖喱同玫瑰配對成功呀!

除咗咖喱魚蛋加咗玫瑰花點綴之外,呢個紫薯玫瑰卷(HKD28)亦相當養眼!淡淡粉紫紅嘅包加埋滿佈玫瑰乾花嘅蒸籠,有種中西合壁嘅唯美感呀!玫瑰卷咬落鬆軟,層次分明,混有淡淡清香嘅紫薯同玫瑰味,幾fresh㗎!

另外黑猛猛嘅係阿華田竹炭包(HKD34)!大家食嘅時候要小心呀,事關阿華田餡一搣開就爆晒出嚟,熱辣辣,辣親嘴仔就唔好啦!小編建議先用筷子喺包上面開一個窿仔,等流沙餡透吓氣先,咁就冇咁易辣親啦!

食點心點可以冇蝦餃燒賣呢,有幾款唔同口味嘅蝦餃燒賣例如:鮑魚燒賣同櫻花蝦餃等,小編就比較推薦黑松露蝦餃皇(HKD49)海膽燒賣(HKD55),都係用咗比較名貴嘅材料,所以價格都相對貴返少少。不過質素就對得住價錢嘅,蝦餃皮薄餡靚,隻蝦爽口彈牙,面嘅黑松露冇偷工減料㗎,夠晒「煤氣味」呀!另外燒賣加海膽亦相當match,用新鮮海膽讚呀!

除咗點心,自家製嘅桃膠亦非常受歡迎!最左邊係黑糖桂圓紅棗杞子燉桃膠(HKD75),黑糖味濃,夾埋紅棗同杞子嘅味道清甜又潤喉,桃膠質地有少少似啫喱,滿足到食甜品又可以養顏,爽;中間係冰糖桂花杞子燉桃膠(HKD75),係三款之中最甜嘅,不過冰糖同桂花嘅甜夾埋超清新,鍾意食桂花糕嘅朋友一定鍾意;冰糖百香果杞子燉雪燕(HKD88)就有濃濃百香果味,食完超清爽解膩。

點心吸引之外,貓店長-燒賣亦相當吸晴㗎!燒賣係一隻相當活潑嘅貓貓,除咗唔怕「生保人」之外,仲好鍾意同人玩!「佢好曳㗎,有時啲客本身鍾意貓都冇所謂,如果客人真係對貓唔太OK嘅時候就要困佢入籠喇!」。原來燒賣係老闆娘執返嚟,見佢肥肥白白又著靚靚咁,真係諗都諗唔到本身係流浪貓。「依家佢半歲囉,半年前街口生咗一堆貓,見到佢好慘就捉咗佢返嚟養,佢真係我養過咁多隻最百厭㗎!」。有呢隻「燒賣」坐鎮點心舖,都算另一種fusion喎!

優點心
地址:中環蘭桂坊和安里6號地舖
電話:2512 9128

營業時間:星期一至五:11:00-22:00;星期六:11:00-00:00

You may also like...

Leave a Reply

Your email address will not be published. Required fields are marked *