【「太二」酸菜魚香港店失準 酸菜唔夠味食完好失望】伏務台

中國餐飲業衝出國際唔係新鮮事,但好似太二酸菜魚咁,因為好食而衝到去美加,再開返嚟香港但係水準反而跌watt喎,你又估唔估到呢?銅鑼灣嘅廚十三老壇酸菜魚聲稱係由美國「太二」班底籌組,但8月29日開業到依家短短個零星期就出現負評喇!小編唔係見網民話伏就跟隊㗎,喺開業第二日,小編已經率先去咗食,點知變咗同網民一樣親身中伏咋嘛!咩情況?等小編將中伏經歷話你知啦!

網民大嘆完全唔係大陸食到嗰種味,仲貴好多添呀!(網上截圖)

餐廳Facebook專頁食物相 — 酸菜魚。(廚十三老壇酸菜魚fb專頁圖片)

嗱,餐廳嘅食物相一定執到靚一靚,等大家睇吓小編當日食嘅酸菜魚啦:

小編試咗老坛酸菜魚(HKD328/小份2人享用),本身個湯應該係清同飲得嘅,但依家賣相俾人一種「水溜溜」嘅感覺囉,有啲唔開胃,椒麻味亦唔夠香濃。「太二」一直嘅口號都係「酸菜比魚好吃」,香港店仲聲稱啲酸菜係由成都直送喎,但呢盤酸菜好散,完全唔夠味,而且分量好少呀!網民話魚有雪藏味,小編呢份就還好啦,但正常貨色囉,完全冇喺大陸食「太二」嗰種驚艷嘅感覺,係兩回事呀!

小編雖然有加豆腐(HKD28/份),但分量好少!咁樣計落食酸菜同魚都幾貴吓,不過點解貴大陸咁多呢?除咗土地問題,唔知關唔關班底係「美國」事呢?如果同一個團隊,冇理由做嘅價錢差太遠㗎嘛,所以小編都搵咗美國同大陸餐牌比較吓:

美國用羅非魚,唔係鱸魚。(2018年2月3日)

香港餐牌。

大陸自助落單。

小編幫大家計吓匯率啦:


咁樣計返,個價錢同美國差唔多,不過就真係貴大陸好多喇!另外小編仲發現美國「太二」都有伏評,睇嚟水準唔太穩定喎!

網民喺美國食後感。(網上截圖 )

網民喺美國食後感。(網上截圖)

小編伏氣:酸菜魚呢種風味菜式,一keep唔到原本嘅味道就出事。廣州總店開嘅時候話每日只賣100條魚可能係綽頭,但其實更容易控制品質。依家由中國去咗美國,再由美國轉返嚟香港搞,經過咁多手,仲keep到幾多成原味同品質呢?仲搞到重點嘅酸菜走晒樣,味道又唔湯唔水咁,呢次堅開心去,失望走呀!

入伏點:廚十三老壇酸菜魚
入伏價:HKD392(已計加一)

中伏by #為食加菲貓
美術by #車雲
攝影by #為食加菲貓《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *