【三文治店轉型推素Menu 野米溫泉蛋飯菇香味濃】素學堂

近年素食受歡迎兼係大趨勢,有唔少餐廳轉型都會加入素食menu,好似灣仔嘅BREAD & BEAST以前主要賣肉食三文治,最近轉menu就設計埋素三文治同小食,夜晚仲變身成KONG by BREAD & BEAST酒吧添,日夜風格唔同晒。不過今次小編就試咗佢哋嘅素食,菜式中西合璧,醬料多用中式調味料,咁特別梗係要食啦!

餐廳結合西式現代風同復古嘅感覺,懶洋洋咁歎返餐都唔錯喎。呢度午餐同晚餐嘅餐牌都唔同,但有啲小食就兩個時段都有,今次小編就揀咗午餐同小食款式試吓先。

紅菜頭沙律(HKD78)嘅紅菜頭冇草青味,菜都好新鮮爽口。配自家調製嘅沙律汁好醒胃,因為用咗墨西哥乳酪醬加蜜糖黑醋,味道酸甜帶啲微辣。

再嚟個小食開開胃,右邊嘅腐乳蓮藕片(HKD38/細)切到好薄,炸完好香脆,勁似薯片,但最令小編著迷嘅係佢陣味!調味用咗腐乳同蛋黃醬,鹹中帶奶香,好鬼match呀!

依家新menu有埋飯喇,牛油果蘑菇溫泉蛋飯(HKD78)最特別係用咗野米,即係一種草嘅種子。野米有「五高」,高纖、高蛋白質、高維他命B雜、高鉀同高鋅,營養價值超高又有咬口。成個飯最主要嘅味係靠篤爆隻半生熟溫泉蛋,再撈勻炒香咗嘅蘑菇同洋蔥,就會有陣香甜味喇。仲有小編大愛嘅牛油果,令飯嘅質感再滑啲。

本身呢度賣開三文治,當然要加款素食啦。好多素食三文治都用大啡菇做主料,呢度就一反常態喎。矮瓜素菜治(HKD88)用烤過嘅茄子做主料,特別香甜,仲有啲鷹嘴頭泥令口感更豐富;再加咗酸酸哋嘅醃蘿蔔絲、微辣惹味嘅墨西哥乳酪醬、牛油果同苜蓿芽都幾多料,甜、酸、辣嘅味道都好融合。三文治包係較厚實同硬身嘅質感,呢樣就睇各人口味要求喇。

跟住介紹啲下酒菜先,右下嘅椰菜仔(HKD58/細)早晚都有供應,燒製之後外層香脆焦香,內裡軟腍,一啖一粒食唔停口囉。椰菜仔有時會有少少苦澀味,但呢款用焦糖、青檸同魚露煮就解決咗問題,因為焦糖味重啲,所以甜甜哋。

跟住兩款小食只喺晚市供應,椰菜花(HKD78)用辣豆瓣醬慢煮,係勁惹味嘅佐酒菜呀!椰菜花好腍但唔會爛蓉蓉喎,因為外層有燒一燒去保持外形。

復古蕃茄(HKD68)唔係想個名得意啲,係堅有呢個品種,佢由最原始冇經過基因改造或配種嘅蕃茄種子種植而成㗎!呢味菜用咗普通蕃茄同復古蕃茄,味道超清甜,再淋咗芝麻大豆油醋提升鮮甜味添。

 

BREAD & BEAST
地址:灣仔汕頭街3號地下
電話:2237 1868
營業時間:星期一至五:12:00-15:00,17:00-23:00;星期六、日:11:30-16:30,17:00-23:00

You may also like...

Leave a Reply

Your email address will not be published. Required fields are marked *