【米芝蓮大廚炮製私房菜 川味深海龍躉滾到起泡】漁牧

原先喺尖沙咀以食川菜同雞煲出名嘅漁牧,最近搬竇移師九龍灣MegaBox插旗,新店裝修大玩中式feel,牆上壁畫仲係人手畫上去,真係氣派不凡!招牌烤鴨可能好多人都知,不過為免有漏網之魚,依家餐廳將大大個風乾機放喺門口當生招牌添喎。新店新介紹,今次唔講燒魚同雞煲喇,其他單點菜式一樣咁正。依家由米芝蓮大廚鋼師傅掌舵,嚟緊會推出私房菜,小編率先試咗啲,真係擺返圍宴客都好得體呀!

試業一個月,午市時間好爆場,想食就要訂枱啦,唔好博呀。

新店多咗幾間VIP房,呢間仲可以唱卡拉OK添,同親友食飯就更加盡興啦。

鋼師傅之前喺六福菜館由開業做到2009年,攞咗米芝蓮之後就轉戰內地,依家再回歸連帶烹調嘅菜式都帶啲內地風味。小編問鋼師傅有冇喺漁牧引入六福菜館嘅菜式,佢就話只有海鮮類囉。講咗咁多,即刻帶大家睇吓有咩正嘢食啦!

介紹新菜之前,先嚟個涼菜九宮格(HKD188)開開胃,有辣有唔辣,有肉亦有素,啱晒唔同口味嘅朋友。其中麻辣牛𦟌、麻辣豬耳同牛肚係小編最鍾意嘅,香口惹味亦煮得夠腍;之後食件爽甜青瓜粒同木耳,清清喉嚨又可以準備食下一道菜喇。

新菜亦係私房菜之一就係呢味香麻味重,但唔太辣嘅漁牧沸騰深海龍躉(HKD588),用咗沙巴龍躉,另外都有5-6斤重嘅大鯰魚俾你揀。鋼師傅話舊時成日講「老魚嫩豬」,魚愈大條就愈好食,因為肉質結實啲。魚肉用滾水浸到大約7成熟就上碟,即刻淋上子彈椒、炮彈椒、花椒等辣椒同滾菜油。上菜嘅時候仲見到啲油滾到起泡泡,令食客可以品嚐到熱辣辣又啱啱夠熟嘅魚肉,嫩滑彈牙。碟底仲有芽菜同紅薯粉,最好係菜油嘅口感唔肥膩,反而更加滑。

另一味私房菜就係特色香辣龍蝦干鍋,不過仲未定價,想食嘅話建議打去問咗先。餐廳選用本地龍蝦,肉質彈牙多肉汁,即使炸過再炒都好鮮甜。一隻龍蝦有斤幾接近兩斤重,呢碟例牌size有4隻龍蝦,夠10位用㗎!呢味菜用嘅辣椒同漁牧沸騰深海龍躉一樣,不過再加咗辣椒醬、豆瓣醬等醬料一齊炒,所以食嘅時候有啲豆豉嘅香甜,之後先有陣香麻嘅辣味滲出嚟;仲有萵苣、蓮藕、薯仔、青瓜同雲耳做配料,真係好豐富呀!

然後點少得漁牧嘅招牌菜呢,老北京烤鴨片皮鴨(HKD170/半隻)大約5斤一隻,每隻鴨都掛咗個號碼牌,可以追蹤返係來自邊個農場㗎!鴨上咗鴨皮水之後風乾一晚,唔使落醃料。先用電爐烤乾鴨身,再轉用荔枝木呢款果木繼續烤,令鴨肉更加香。呢度嘅片皮鴨唔使加錢都俾埋肉你食,其實幾抵吓。

餅皮幾薄,餐廳好細心咁每塊都用紙隔住易夾啲。包好之後仲可以咬到鴨皮脆口嘅質感,食到「嗦嗦聲」添,最驚喜係鴨皮睇落去肥,食落唔覺油喎。不過肉味會淡咗,因為餅皮嘅香味會蓋咗少少,想試濃啲嘅肉味就建議就咁食。

漁牧混豬(HKD298/半隻)都係好多人點嘅,特別之處係自家調製嘅醃料同三色醬料。100日嘅乳豬用西芹、紅蘿蔔、辣椒等新鮮材料醃製,比平時婚宴食嗰種清甜啲。乳豬燒到後段仲釀埋煮過嘅糯米飯一齊燒,將豬油逼入糯米飯,令味道更加香。食嘅時候除咗有平時嘅乳豬醬之外,仲有加咗沙律醬調製嘅抹茶醬同秘製芥末醬,兩種帶甜但清啲嘅醬料可以減退乳豬嘅肥膩感。不過小編最鍾意係乳豬皮呀!光皮嘅燒法鬆脆啲,唔會好硬,堅食唔停口囉。

曹池汁大蝦配手抓餅(HKD108)嘅醬汁有啲似咖喱炒蟹嘅味道,但質感唔杰身,手抓餅都易沾起醬汁。不過手抓餅記得趁熱食,因為佢用酥油整,凍咗就會有啲酥味喇。大蝦肉質好結實彈牙,啖啖肉勁滋味。

雙色水晶球(HKD48)睇落普通,但用足料㗎!尤其係紅豆苛水晶球,除咗有一粒粒嘅紅豆增加口感,仲好難得咁食到陳皮味呀!

雙色馬拉盞(HKD58)有黑糖同抹茶味,口感鬆軟到似海綿蛋糕,但質感厚啲。味道唔會好甜,做飯後甜味都唔覺膩。如果你係嗜甜嘅朋友,佢配嘅肚臍餅、百力枝同煉奶就啱晒你喇。

 

漁牧
地址:九龍灣宏照道38號企業廣場5期Megabox13樓5號舖
電話:2529 8383
營業時間:星期一至日:11:30-15:00;17:30-23:00

You may also like...

Leave a Reply

Your email address will not be published. Required fields are marked *