【菠菜「純情豬」拉麵有幾伏? 綠色湯底唔開胃飲落有渣】伏務台

最近小編上網見到旺角有間拉麵店出咗個菠菜湯拉麵,評價都幾極端吓喎,有人大讚好食、有人就話中晒伏!咁就等小編親身試吓啦!

呢間東京築地拉麵喺雅蘭中心地庫,裝潢唔錯㗎,整整齊齊,有連鎖式拉麵店嘅感覺。不過唔知點解坐低就聞到有啲……清潔劑嘅味道,老實講,唔多唔少都有啲影響胃口!至於大家都熱議嘅服務態度方面,小編就覺得唔算太差,成個場得一個樓面,落單同送餐慢少少係可以理解嘅。

小編就試吓評價最兩極嘅菠菜湯拉麵,個名仲好有心思㗎,叫綠魅拉麵(HKD68/需加一)。睇吓網友嘅正評先!

不過又有唔少網友俾負皮喎。

講到話鍾意食拉麵兼鍾意食濃湯嘅朋友都唔好試喎……咁咪即係叫小編唔好試?不過我不入地獄誰入地獄呢?

Menu上話呢個拉麵嘅湯底係用咗新鮮菠菜汁同埋魚湯熬製,至於配菜方面就用咗岩手縣嘅「純情豬」,吓?究竟有幾純情呢?小編好期待呀!

其實我都知道佢個湯底綠綠哋係好正常,不過望落個顏色飽和度比Menu深色好多喎。其實小編本身都試唔少奇怪顏色嘅食物,不過呢個湯唔止係湯咁簡單,佢新鮮到有啲菜渣類嘅物體浮喺湯上面,又有啲油咁,實在令人唔太開胃。

食拉麵梗係要先飲啖湯啦,個湯真係好fresh㗎,應該係冇味精嘅,因為連味都冇,飲落正如網友所講「好似阿媽煲嘅菠菜湯咁,仲要唔夠鹹」。菠菜味冇、魚湯味都冇,實在唔知自己飲緊乜。

湯底失望唔緊要,或者來自岩手縣嘅「純情豬」會Surprise到我呢!不過當你咁諗嘅時候就錯喇!「純情豬」的確好Pure好True,佢Pure到連味都冇,真係出菠菜湯而不染呀!冇計,個湯都冇味,又點可以要求「純情豬」寶寶自己有味呢?

拉麵最重要係麵,小編知道呢度標榜自家製拉麵嘅。不過呢……自家製到好似超市平價拉麵咁都好似唔太簡單嘅。唔通係師傅想大家體驗吓港式拉麵?食落口唔彈牙又幼,一啲口感都冇。拉麵組成嘅三種元素都冇樣得,小編今次真的被伏暈了。

至於網友提到好味嘅溏心蛋,點解我冇嘅!小編走咗之後先知佢俾少咗隻蛋我,所以隻蛋好味與否小編就無從判斷喇!不過其實都係伏㗎喇,大家想試嘅話就三思喇。

 

小編伏氣:最伏其實真係個湯底,個色綠到咁又有菜渣,質地就稀稀咁,但夾雜住菜渣,飲落口真係好唔順口。顏色綠到見到都驚,令人不禁懷疑佢有冇色素;另外個「純情豬」……我只可以話佢無違反商品說明條例嘅,畢竟佢真係好純情-無調過味。

入伏點:東京築地拉麵
入伏價:HKD70.4(已計加一)

中伏by #肥仔文
美術by #車雲
攝影by #肥仔文

《伏務台》星期一伏務大眾,歡迎各界報料。

 

You may also like...

Leave a Reply

Your email address will not be published. Required fields are marked *