【鰻魚牛油果貨不對辦 齋舖知衰:可能搞錯咗!】食焦

又有貨不對辦喇!不過今次就誇張啲,唔係話件雞少咗幾嚿、碗麵得返半碗喎(都係唔可以接受㗎喇),而係叫嗰樣嘢直頭係冇咗,有冇離譜啲呀?話說有網友去咗旺角一間齋舖度買外賣,叫咗個鰻魚牛油果卷,點知一打開個盒,鰻魚呢?鰻魚呢?

餐牌上面張食物相是咁的。(中伏飲食報料區fb專頁圖片)

外賣打開個盒見到嘅實物圖係咁嘅!(中伏飲食報料區fb專頁圖片)

見到咁嘅情況,又真係好難唔發嬲喎!(中伏飲食報料區fb專頁截圖)

呢位事主中晒伏,po上網俾大家睇吓個分別,餐牌上面張相同實物真係差得遠,就咁睇完全唔會發現係同一樣食物先勁囉!事主留言話「又係乜都唔駛講睇圖就知伏喺邊……外賣鰻魚牛油菓卷,返到公司一打開盒已經X咗出聲,打落去齋舖全程㩒住把火投訴,最終忍唔住鬧咗句:有冇錯得咁X離譜」,其他網友睇完都話唔可以接受啦!

就咁睇真係青瓜卷無誤!(中伏飲食報料區fb專頁截圖)

一句圖片僅供參考係咪大晒先?(中伏飲食報料區fb專頁截圖)

隨緣啦咁!(中伏飲食報料區fb專頁截圖)

鰻魚卷變咗青瓜卷,事主仲話「買俾個食齋嘅客食嘅,一打開盒,我以為自己拎咗盒廚餘」,不過有網友就話去過呢間旺角齋舖,之前食過都冇出事,仲話好食添,事主都有回應嘅,原來事主都算係熟客,佢話上次都有叫過個鰻魚牛油果卷,正正常常,只係要佢等咗成45分鐘搞到有啲燥底啫!

有網友就話上次食過好味喎!呢款係軟殼蟹卷!(中伏飲食報料區fb專頁截圖)

樓主就回應,呢個軟殼蟹卷係冇出事嘅!(中伏飲食報料區fb專頁截圖)

咁事主打返去間齋舖度投訴又點呢?事主話「聽電話件阿姐攬晒上身話:唔好意思,我啱啱返咗三日工,乜都唔識可能我攪錯咗,對唔住~」有網友就話肯道歉都算態度好喇,但係令人莫名其妙嘅係,如果真係搞錯咗,消失的鰻魚又去咗邊呢?明明餐牌上面係冇青瓜卷或者牛油果卷㗎喎,咁真係搞錯得太離譜喇!雖則話係食齋啫,唔係真係齋到咁吓話?

其實賠罪都冇用呀!還返碟似樣嘅鰻魚牛油果卷實際啲喎!(中伏飲食報料區fb專頁截圖)

要聽網友的話。(中伏飲食報料區fb專頁截圖)

You may also like...

Leave a Reply

Your email address will not be published. Required fields are marked *