【去街市買生猛靚蟹 點揀花蟹白蟹三點蟹?】街霸

成日話去街市買魚蝦蟹煮返餐海鮮宴,係咪街市海鮮真係最新鮮?點先揀到靚海鮮呢又?今集街霸就帶大家去到藍田嘅啟田市場揀蟹,入面有檔環球海產,等蟹后冰姐介紹吓最近當造嘅幾款蟹啦!


冰姐話佢哋檔口嘅海鮮全部用清澈嘅水質去養住,包保大家買到都係新鮮貨。「死咗嘅唔會賣俾人,做生意都係將心比己啫,啲人知道你賣新鮮嘢自然會愈做愈旺啦!」,小編見到隔離有伯伯親手揀緊蟹,隻隻蟹腳揈揈超生猛!

講真,雖然話啲蟹隻隻都用草綁實咗手手腳腳啫,但見佢哋隻隻都咁生猛,就咁用手捉住都驚啦,仲話要買返屋企劏……好似好難咁喎!冰姐就教我哋拎蟹嘅時候可以拎住佢條草,又或者直接拎住佢個肚,只要唔掂到佢個口或者鉗就唔會整親喇!劏蟹最好戴手套,首先喺肚嘅蓋掩附近斬一刀,基本上已經唔會再郁㗎喇,跟住再慢慢處理手手腳腳。

花蟹大家食得多,不過大家又知唔知道公嘅花蟹(HKD168/斤/時價)殼上有藍色花紋?真係好靚喎,公蟹相對比較厚肉少少,而母蟹肉質就相對幼嫩啲。冰姐仲話:「喺農曆八月十五前後都好夠肥㗎喇呢啲蟹!」。下星期就中秋節,大家準備好食蟹未呢?

除咗花蟹之外,其實三點蟹(HKD68/斤/時價)白蟹(HKD88/斤/時價)都係唔錯嘅選擇!呢兩款蟹嘅特點係蟹殼相對較薄身,所以食嘅時候唔使花咁多工夫,而且肉質亦好鮮甜,蟹膏亦好足。不過買白蟹嘅時候就要分清楚係蟹公定蟹乸喇,鍾意食實肉就買蟹公,鍾意食蟹黃就揀蟹乸喇。食蟹除咗鮮甜嘅蟹肉夠吸引,蟹黃同蟹膏相信亦係大家嘅favourite !大家又知唔知蟹黃同蟹膏有咩分別?

上圖蟹肚蓋掩呈長條形嘅係蟹公,蟹膏係蟹公獨有嘅。其實蟹膏係蟹公精囊精液同器官嘅混合體,大家揀蟹時可以用少少力撳吓蟹肚位置,如果飽滿嘅話就代表呢隻蟹公已經夠成熟兼有大量蟹膏喇!蟹膏含有豐富蛋白質、脂肪、磷脂同維生素,食落厚實甘香。不過三高人士就唔好掂喇!

另外呢隻蟹肚蓋圓啲嘅就係蟹乸。平時食嘅蟹黃就係蟹乸嘅卵巢同消化腺,口感幼滑。蟹黃同蟹膏一樣含有豐富蛋白質,營養好豐富㗎!不過油脂同膽固醇含量亦相對比較高,唔好食得咁過份呀!

街霸最愛:其實街霸最鍾意食三點蟹,貪佢平得嚟又易處理。佢嘅殼相對花蟹同埋其他蟹都脆弱啲,所以劏嘅時候冇咁考工夫。價錢雖然相對平,但係蟹肉亦非常鮮甜,依家呢個時節嘅三點蟹嘅蟹黃同蟹膏都好肥美,平平哋就食到好嘢邊個唔Like吖?

環球海產
地址:藍田啟田道50號啟田市場
電話:從缺
營業時間:從缺

You may also like...

Leave a Reply

Your email address will not be published. Required fields are marked *