【人氣網店開到實體店 抹茶tea set嚐盡甘甜苦】瓜破菓子店

唔知大家有冇發覺,好多甜品師傅都係男士呢?人氣蛋糕店瓜破菓子店都唔例外,老闆阿禧好鍾意日本文化,日本甜品係咪超晒班?「日本製作甜品嘅水平都幾高,除咗可以學到主流整法式甜品嘅技巧,仲有和菓子同其他類型嘅甜品。」阿禧學成返嚟就喺2012年先開網店,經過6年時間終於喺葵涌有實體店,不過仍然以預訂單為主要方向。堂食就不定時更換甜品款式,一場嚟到,小編先試主打嘅抹茶tea set,再試件裝款式啦!

店舖只有5個位,所以會以外賣為主打。

阿禧喺現場後製各款甜品,每個步驟都好仔細㗎。

抹茶尽し(HKD88)有6款,俾大家食到抹茶唔同嘅味道,點解咁講?「有啲客人食完都會話唔夠抹茶味,唔夠苦,不過我哋都係想攞到平衡嘅感覺囉。抹茶嘅甘、甜、苦等等味道都會喺呢個set入面品嚐到,同時可以試到唔同嘅質感。」

呢碗仔底有抹茶慕絲,面有團子蜜柑紅豆。微甘嘅抹茶慕絲淋咗蜜糖之後會慢慢出水,所以要快啲食。

抹茶白豆蓉係幾款之中小編覺得最甜嘅,同埋帶啲豆香。脆餅點少少嚟食已經好有味喇。

抹茶松露朱古力真係俾你食到抹茶嘅甘苦味。質感好滑,入口就化開,好正!

呢個黃豆脆餅有啲硬,但烘烤過嘅香味好吸引人。抹茶醬質感有別於平時嘅果醬,好流質,味道偏清新,同黃豆脆餅好夾!

清甜嘅抹茶蛋卷都深得小編歡心,蛋糕好鬆軟,濕潤唔乾;抹茶忌廉輕輕加強抹茶嘅甘香。

抹茶班戟都令人充滿驚喜!當你以為只係包住忌廉芝士同抹茶忌廉嘅時候,仲有粒甘甘哋嘅抹茶啫喱喺中間呀!試完咁多款,小編都體會到阿禧嘅苦心,唔同嘅質感配搭真係突出咗抹茶最細膩嘅味道,又同時食到多元化嘅甜品喎。好,跟住小編要攻陷餅櫃喇!

當日小編12點去到,見餅櫃銷情唔錯,不過阿禧都有啲無奈咁講:「依家開業初期,好難掌握商場人流,所以餅櫃每日大約有8-9款件裝蛋糕,每款4-5件啫。因為有時4點左右會賣晒,有時收舖又剩好多。不過賣晒都仲有堂食甜品同繼續接預訂單,因為工場喺附近。」。小編都幾好彩,下面試嘅2款cake嗰頭食緊,呢頭就賣晒喇!

W(HKD42)係有2款芝士嘅芝士杯,面層係軟滑芝士cream、中間係忌廉、底層係焗過嘅芝士粒拌餅乾,一吓潷到落底就可以食到三層口感。小編本身唔係芝士愛好者都覺得幾好味,芝士唔膩又鹹淡適中,食晒成杯都唔會覺得滯喎,難怪受大家歡迎啦。

薑(HKD36)由開店到依家都係熱賣款式,杏仁撻底有淡淡清香,唔似牛油餅皮咁易散開。中間嘅檸薑忌廉質感有少少似吉士,因為比平常忌廉厚啲,不過仍然好幼滑;入口真係有陣薑嘅辣味,加上檸檬嘅酸味更容易品嚐到當中嘅甜,所以味道相對濃啲。蜜蜂仔用白朱古力而成,唔太甜亦唔會搶咗撻嘅味。

仲有自家製曲奇可以買走,款式好多元化喎。

瓜破菓子店
地址:葵涌葵昌路72-76號活@KCC 4樓409號舖
電話:2135 6705
營業時間:星期一至日:11:30-20:30(截單時間:19:30)

You may also like...

Leave a Reply

Your email address will not be published. Required fields are marked *