【杜拜王子請食飯埋單45萬 上海豪門宴食咩要咁貴?】食焦

一餐8個人嘅晚餐可以食到幾貴?最近有張天價帳單喺網上流傳,8個人食咗20道菜,埋單就要40萬人仔,即係差唔多成45萬港銀!呢場富豪宴發生喺上海一間名店「西郊5號」嘅餐廳,率先po喺微博嘅網友,除咗po咗啲鮑魚呀蟹呀嘅食物相,仲po埋張天價帳單出嚟,引來瘋狂討論同轉發!

最先喺微博出現嘅原po,6張食物相有鮑魚有蟹有螺頭,寫埋「人均5萬的晚餐」,仲話明唔係炫富喎!大家點睇?(網上圖片)

8個人20道菜嘅天價帳單係咁嘅!(網上圖片)

喺張天價帳單度發現,20道菜清楚列晒出嚟,見到最貴嘅鱷魚尾燉湯要16800人仔,野生大王魚盛惠15800人仔,仲有第三位貴價嘅係清酒凍半頭南非鮑要12800人仔,每人一隻即係8份已經要過10萬人仔喇!雖則話「西郊5號」係名店,但平常去呢度食一餐嘅消費,人均頂晒籠只係二、三千,去到咁誇真係好罕見!

盛宴現場喺上海嘅高檔餐廳,名叫「西郊5號」。(網上圖片)

餐廳嘅名人老闆兼名廚孫兆國,事後仲拍埋製作過程出嚟講返豪門宴食過咩添!(網上截圖)

當議論緊究竟張單係真係假嘅時候,「西郊5號」嘅老闆兼明星廚師孫兆國就跳出嚟認晒成件事,仲話當晚嘅8人豪門宴係由杜拜王子請客,食到咁豪咁貴係因為當晚嘅餐單同食材都係私人訂製,平時係食唔到嘅!佢仲話:「杜拜人請中國人吃飯……在杜拜根本不算什麼!」。即係叫大家咪咁大驚小怪啦!

野生大響螺。(網上截圖)

成隻手咁大嘅長江蟹。(網上截圖)

呢位名廚老闆仲強調當晚嘅食材全部都係合法㗎,好似鱷魚尾燉湯用嘅鱷魚係喺廣東、福建人工養殖場提供嘅,並唔係受保護嘅野生動物。至於有份食當晚豪門宴嘅賓客之一、亦係第一個po張天價帳單出嚟嘅嗰位仁兄,原來真身係一位上海好出名嘅富二代,不過當佢知道搞到咁大迴響之後,就將自己個微博全部鏟清,只係留返張中指圖畫,睇嚟好似好嬲咁款!

天價帳單原po人其實係上海有名嘅富二代,俾網民起咗底之後,佢即刻將微博全刪,留返呢一個中指圖!(微博圖片)

呢位富二代仲俾人爆料話,當晚雖然係由杜拜王子負責請客,不過富二代都有來有往㗎,知情人士話富二代當晚自備咗成50萬人仔嘅酒水到場㗎!咁其實計埋酒水,呢餐真係百萬豪宴喎!飲飽食醉邊個最開心?梗係間餐廳啦,天價帳單瘋傳之後,日日爆場勁多客去食呀!無端端變咗另類宣傳,掂啦!

「西郊5號」位於上海市長寧區虹古路,呢間名店一直都禁止食客拍照,被人稱為係「最神秘美食殿堂」。(網上圖片)

餐廳入面放滿名貴古董,古典櫥櫃又放滿貴價瓷器,感覺好grand啫!(網上圖片)

You may also like...

Leave a Reply

Your email address will not be published. Required fields are marked *