【賣相吸睛打卡甜品店 夢幻少女系玻璃杯心太軟】菓甜品

幾時都話女人有兩個胃,一個食正餐、另一個梗係食甜品啦!最近尖沙咀開咗間西式甜品店菓甜品,除咗味道掂,甜品嘅顏值都好高吓,款款都可以相機食先打卡!菓甜品嘅3位老闆都係做鐘錶行業出身,開店全靠一股衝勁,話做就做,由打算開店到正式開張,只係一個月時間就搞掂!快、狠、準,行動力一流!

不過唔好以為開店好容易,其實三位老闆捱咗唔少苦頭㗎,話晒都係第一次接觸甜品世界,由最初做中式甜品反應唔太好,到依家轉做西式甜品做出少少成績,單係諗餐單同搵食材嘅過程都花咗唔少心機,雖然遇到好多囷難,但係反而愈戰愈勇,堅持親力親為繼續作戰啦!

餐廳開放式設計,睇落冇咁大壓迫感,坐得舒服啲!

芝士粟一燒(HKD58),就咁睇以為係半碌真嘅粟米,望真啲,原來只係粟米造型整成嘅甜品,小編都差啲俾佢呃到呀!作為店內人氣招牌,為咗唔想客人一見到黃色就覺得係芒果味,所以特登整個粟米味嘅甜品,有啲新鮮感!

用芝士、粟米蓉同日本味醂而製成慕絲 ,味道鹹鹹甜甜,帶有淡淡粟米味道,入口甜而不膩。

入面就係自家製嘅蜂蜜海錦蛋糕,食落口味道好夾㗎!蜂蜜海綿蛋糕味道濃郁又鬆軟,好好食!

桂花白酒燉雪梨(HKD56)賣相好華麗。先將桂花寒天雪凍,再手切成條狀放入碗內,遠睇好似有啲金箔襯托住雪梨咁,感覺唔會太單調;雪梨就用片糖、桂花糖同白酒燴最少兩小時,食起上嚟入晒味呀!

味道整體配合得天衣無縫,食到有酒香嘅同時又唔會搶走雪梨清甜嘅味道,有驚喜!

桂花寒天變成條狀後感覺好似食緊「河粉」咁,入口好香桂花味,口感煙韌又Q彈 ,都幾特別!

意式黑松露咖啡奶凍(HKD54),黑松露都可以變成甜品?聽個名好似唔多夾咁,不過當你食咗第一啖之後,就會驚嘆原來加咗黑松露嘅甜品係咁好食嘅!主廚Stephanie之所以諗到呢個idea,都係因為港人鍾意食黑松露乜乜乜,於是忽發奇想,不如試吓將甜品都加入埋黑松露,估唔到又幾成功喎!

將咖啡同黑松露mix埋一齊做成奶凍, 口感滑溜。入口第一啖先食到咖啡味,之後黑松露味道會慢慢滲返出嚟,最正係上面有唔同配料,有爆炸糖、Raspberry、馬卡龍同蘑菇造型嘅蛋白糖霜餅,賣相色彩繽紛,食落口又有唔同層次,好睇又好食!

絲絲入心(HKD64),將心太軟用另一種形式呈現,見到即刻少女心爆發呀!賣相吸睛,亦係最考工夫嘅一樣甜品。面頭塊曲奇要特別製造,造成一個月亮形,將心太軟放喺上面,切落中間嗰時,啲朱古力漿就會流晒出嚟,呃like話咁易啦!

影完相,又應該點食好呢? Stephanie就話將所有嘢推晒落去玻璃杯入面撈勻咁食就得喇!心太軟腍身嘅口感,撈勻後連同曲奇同雪糕嚟食,既可以食到曲奇嘅香脆,又保留到心太軟嘅味道,正呀!

依家喺店內只要打卡加讚好菓甜品嘅Instagram同Facebook,就可以獲得全單95折優惠,快啲約齊甜品迷出動啦!

菓甜品
地址:尖沙咀寶勒巷3號萬事昌廣場地下2-3及5號舖

電話:3590 2088
營業時間:星期一至星期五:12:00-00:00;星期六:15:00-00:00;星期日:18:00-00:00

You may also like...

Leave a Reply

Your email address will not be published. Required fields are marked *