【鵝頸街市地踎首選 完美咖喱+脆皮爆汁燒鴨】街霸

銅鑼灣多嘢食係人都知,基本上中西日韓泰乜菜都有,幾乎噏得出都有得食咁滯,又有唔同國家嘅過江龍餐廳,真係多到數唔晒!中高檔餐廳選擇多,咁銅記嘅地踎菜有冇正嘢呢?今次街霸就帶你去時代廣場……後面嘅鵝頸街市熟食中心!


一入到熟食中心就見到九記車仔麵排晒長龍,不過今日街霸要介紹嘅唔係佢,係行過少少嘅清真惠記!雖然場面冇九記咁墟冚,但一樣坐滿晒人㗎,而且流動性超大,好多附近返工嘅朋友坐低埋頭扒兩扒食完就走,完全係打工仔飯堂格局!

最出名係咖喱羊腩同牛腩,咖喱汁仲被譽為「完美咖喱」同「白飯剋星」添!好多朋友仔都話因為個咖喱汁太好味所以要嗌多碗飯。今次街霸去到嘅時候,羊腩已經一早賣晒喇,真係超受歡迎喎!冇晒羊腩,惟有叫咖喱牛腩飯(HKD48),落單唔使5分鐘牛腩飯已經送上枱面。店員姐姐全程笑晒口,感覺好親切!

咖喱汁顏色望落相當濃郁,唔係港式咖喱feel,聞落帶有印尼咖喱嘅香料味!牛腩完全索晒啲汁好入味,不過入口略嫌有少少韌!咖喱汁名不虛傳,辣辣哋好過癮,味濃但不over,真係白飯最佳拍檔!街霸見到同枱嘅食客都清晒碟,一滴汁都冇剩呀!


燒鴨咁出名唔係唔食呀?馳名掛爐燒鴨(HKD125/HKD74/HKD44)有三個分量可以選擇,街霸叫咗細嘅例牌試試。係鴨髀呀!喺冇特別要求嘅情況下,竟然獲得鴨髀一隻,太surprise喇!咬落肉厚又juicy,肉質完全唔嚡,夾埋鴨皮上嘅油脂頂級滋味!好耐冇食過令人驚歎嘅燒鴨了!難怪咁多人讚口不絕啦!

另外古法蝦子柚皮(HKD15)亦好出名,不過咁啱嗰日又係已經賣晒!其實依家都冇乜地方仲做緊柚皮㗎喇,如果大家想食,記住要早啲去呀!

街霸最愛:燒鴨同咖喱……街霸覺得燒鴨真係非食不可!皮脆肉嫩多汁嘅燒鴨唔係度度食到,兼夾價錢又相宜!不過如果大家貪心想食咖喱又想食燒鴨,其實有個隱藏叫法嘅!食開嘅熟客都會叫燒鴨飯加咖喱汁,咁就兩樣都食到喇!

清真惠記
地址:灣仔寶靈頓道21號鵝頸街市1樓鵝頸熟食中心5號舖
電話:2574 7731
營業時間:11:00-18:00

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *