【幸福堂風波元朗加盟店照開 香港代理呻委屈總店企硬】食焦

老虎堂之前被爆黑糖唔係手炒而鬧出風波,今次就輪到幸福堂出事喇!事緣係台灣幸福堂喺fb專頁公告,「香港幸福堂多次未按照總公司合約規範內容及 SOP 手法營業……」,仲發出最後7日通牒,如果香港店仲未配合,就會另覓其他代理!不過官方好快就刪咗呢個po喎!

香港店以「幸福的小風波」嚟回應台灣總店嘅首個公告,就咁睇以為雙方已經溝通返喎!(香港幸福堂fb專頁截圖)

仲有埋呢三項承諾添喎!(香港幸福堂fb專頁圖片)

總店即刻再出聲明,態度更加強硬喎!即係對香港代理嘅回應唔收貨啦!(台灣幸福堂fb專頁圖片)

隔咗兩日過埋中秋,香港店先有反應,仲話係「幸福的小風波」,出po講到好似事情已經圓滿解決咁喎,「我們香港幸福堂亦跟台灣幸福堂有一個圓滿的討論……堅信香港幸福堂是能抬頭挺胸面對……」不過總店似乎唔多收貨,隨即再出聲明,「此次港台代理事件目前為止並無共識,中間嘗試告知都視若無睹……」,各有說法變咗另一塲羅生門喎!

元朗加盟店懶理風波乜乜乜,如期9月底前正式營業!(網上圖片)

香港代理官方都有出po介紹元朗店,仲#合法生育!幾咁挑機呀!(香港幸福堂fb專頁截圖)

睇返最初總店嘅公告,其中講到喺未有任何共識同改善前,係絕不允許擅自開放加盟嘅,不過你有你講,香港店亦都事先張揚9月底會有新分店,真係喎,元朗加盟店理你乜嘢違規風波,新鮮熱辣正式開張,香港店喺專頁仲hashtag咗#合法生育,話之你咁款!喺呢個星期日、即係最後通牒嗰日,元朗店仲搞gimmick玩買一送一添!依家兩邊搞到勢成水火,香港代理回應傳媒就話,係總店要求更改店面裝潢,包括個招牌要係凸字設計、招牌竹籤筒要擺喺櫃台……

喺專頁度呻有口難言。(香港幸福堂fb專頁截圖)

都係唔講得係乜委屈。(香港幸福堂fb專頁截圖)

算唔算曲線答咗香港代理都係咁諗?(香港幸福堂fb專頁截圖)

香港代理就話咁樣做係唔切合香港環境,唔係唔想配合、係環境因素唔得喎!總店就話香港店唔理質素只係掛住賺錢,回應台灣傳媒嗰陣話「就跟他說珍珠一定要炆,炆到多久時間……但他們員工就跟我們說哪有時間炆啊!我們是很講究我們品質還有品牌的,他們是為了要撈錢。」原來唔止要手炒,仲要炆珍珠?

網友有咁諗法喎!(香港幸福堂fb專頁截圖)

即係個仔做乜阿媽都唔滿意?(香港幸福堂fb專頁截圖)

網友梗係食花生多,有人話係咪見到香港店做得掂,想自己攞返嚟做,點解自己唔一早直營呀?最妙係香港幸福堂嘅fb admin竟然答話「你看得真透」!仲未止㗎,admin仲喺網度呻話好委屈,但係有口難言唔講得,當然有人同情有人鬧啦!有網友就問出重點,就係依家搞到咁,啲材料仲係咪台灣運嚟先,官方就好肯定咁話,所有都係台灣原材料喇!不過點都好,香港人都係照排隊照打卡㗎喇!

咁過埋最後通碟係咪都冇事先?(香港幸福堂fb專頁截圖)

呢個名創意如何?(香港幸福堂fb專頁截圖)

You may also like...

Leave a Reply

Your email address will not be published. Required fields are marked *