【可愛「糖妹」柴犬巡場 手沖精品咖啡三級制】BLACK SUGAR coffee & lifestyle

喺尖沙咀嘅BLACK SUGAR coffee & lifestyle,有個好可愛嘅店長駐場,有唔少食客都係為咗佢而去捧場㗎!邊個咁巴閉先?

佢就係柴犬店長「糖妹」喇,一見到有客人,呢位店長就會即刻叫返兩聲嚟歡迎客人!

依家「糖妹」七個月大喇,雖然好百厭,不過同爸爸William感情非常之好,日日都糖黐豆咁,好sweet㗎!全靠「糖妹」咁鬼可愛,好多食客見到佢都即刻冧晒,仲忍唔住要同佢selfie返幾張相添啦!

最初有開精品咖啡店嘅念頭,老闆William話係想將自己最喜愛嘅柴犬同咖啡結合埋一齊。兩年幾前喺何文田太平道開咗第一間店,咖啡店名就係以自己嘅愛犬「黑糖」為名,當其時以柴犬為主題嘅咖啡店唔多,所以吸引咗唔少愛狗之人幫襯;到咗今年,機緣巧合下發現尖沙咀新舖,同太平道總店嘅地理環境好似,都係旺中帶靜feel,加上又領養咗「糖妹」呢位新成員,於是就扑鎚決定喺麼地道開分店。

咖啡店走型格歐美風,配上木系家具,warm得嚟又有啲性格。

原來William仲曾經擔任過咖啡比賽評審,對咖啡非常之熱愛嘅佢,喺店內就會見到佢搜羅自世界各國唔同產地嘅咖啡豆,客人想買返屋企沖咖啡或者送俾朋友都得㗎!

食物貴精不貴多只有十幾款。Avocado & Egg Toast w/salad(HKD98),William深信好嘅食材自然做到好嘅出品,所以喺搵食材方面落咗唔少心機,會去市場揀最當造嘅牛油果,食落口感都特別清新。配上沙律蛋同香脆多士一齊食,三種口感超級滿足!加咗沙律醬會好膩?咁你就錯啦,沙律醬都係自家製,入口一啲都唔覺膩㗎!

Pesto Chicken Penne(HKD128),香草醬係自己調製,每一啖都充滿住小店味道;面頭仲會灑上芝士碎,每啖都食到芝士嘅鹹香,夠晒邪惡呀!

雞肉嘅肉質厚實,香草汁滲晒落雞肉度,每一啖都充滿住香草味道,夠晒入味;長通粉煮到啱啱好,連埋蕃茄仔一齊食,幾咁fresh!

Homemade Waffle w/ice cream(HKD88),Waffle比一般嘅較為厚身、蛋香味十足,外脆內軟。

仲熱辣辣上碟嘅Waffle好香口,配上楓糖糖漿同楓糖雪糕,冰火滋味呀,味道又夾,話咁快食晒成個喇!

講到明精品咖啡店,梗係要試吓咖啡啦!Caffe tonic(HKD50),用自家品牌嘅house brand咖啡豆同tonic water mix埋一齊,飲落口先會感受到甜味,之後又會有啲酸味慢慢滲出嚟,帶有果香之餘又不失咖啡原有嘅味道,口感好多層次,絕對做得出精品咖啡先飲到嘅水準呀!

小編仲試埋手沖咖啡,William話手沖咖啡實在有太多選擇,怕列晒出嚟會令到客人唔知點揀,所以就簡單分為三個類別;分別係Foundation(HKD60)Discovery(HKD80)Competition(HKD100)。Foundation代表日常都可以飲到嘅咖啡,以果仁味為主,甜度較高;Discovery就係當你對精品咖啡有一定嘅認識,想試多啲唔同嘅風味,呢款就啱晒你喇;最後Competition就係比賽級別嘅咖啡,飲落去嘅味道你唔會覺得係咖啡,反而會飲到好重花香、酒香同水果嘅味道,都幾得意。

當日小編飲嘅就係Competition(HKD100),倒轉個杯係柴犬嘅模樣,非常可愛!

較為特別係杯口設計,分為平口同尖口,飲落去嘅味道原來都會有所不同,用尖口嗰邊飲,小編會覺得酸味重啲;用平口嗰邊飲就會苦啲,整體嚟講味道甘香,酒香味濃同時又會帶有水果嘅香味,一啲都唔似飲緊咖啡呀!

BLACK SUGAR coffee & lifestyle
地址:尖沙咀麼地道68號帝國中心地下G34號舖

電話:2811 9906
營業時間:星期一至五:08:00-20:00;星期六至日:09:00-20:00

You may also like...

Leave a Reply

Your email address will not be published. Required fields are marked *