【咖啡師一償心願開地舖 時令素cake鎮店之寶】素學堂

要搵到心水舖位開業真係唔易,好似Lucy COFFEE & FOOD就幾經轉折先開到地舖。老闆阿蛋同Sophie本身係咖啡師,最初只係租餐廳嘅咖啡吧沖咖啡,之後寄居喺朋友嘅手作市集。由於兩個人本身都好鍾意食食食,又覺得坊間有好多食物都唔知成分由來,所以佢哋就想自己推出低油、鹽、糖,比較優質嘅餐飲,於是喺荃灣工廈嘅樓上舖就開咗店!做咗四、五年之後,開地舖嘅心願冇變過,終於喺上個月大舖搬細舖兼落地喺長沙灣喇!舖頭細咗有冇唔開心?佢哋反而樂得自在喎,因為更容易控制食物質素,令客人食得滿足同開心先最重要咁話。食材方面一啲都唔馬虎㗎,酵母、麵包同醬汁全部都係自家調製,所有蛋糕都採用高級食材,好似日本蛋、高級橄欖油、法國牛油、有機椰棗同有機椰子油等等。咁用心整cake,小編要試多幾款先得喇!

除咗招牌甜點,蛋卷、蛋糕、撻之外,餐廳都有供應少量輕食,例如沙律、貝殼粉、自家製麵包、素食等等;飲品就有冰滴咖啡、手沖咖啡、拿鐵同茶飲等等,款式幾多元化。

純素芒果熱情果撻(HKD62/件)係小編最鍾意嘅,不過生果會按當造期而轉換。酥脆嘅撻底配自家製素杏仁餡,仲加入咗堅果喺入面幾好咬口;腰果忌廉好滑,甜而不膩 ,同芒果乾、新鮮熱情果同新鮮芒果粒好夾。

焦糖香料炒蘋果忌廉蛋糕(HKD68/件;HKD480/6吋)冇用蛋同奶,蛋糕依然鬆軟唔乾,口感亦唔油。兩層蛋糕中間搽咗自製素焦糖,再夾住用肉桂炒過嘅蘋果。外層就掃咗自製素忌廉,再放上自製蘋果乾,成件蛋糕甜度啱啱好,夠飽肚而唔會頂胃。如果想訂原個蛋糕,就留意Lucy COFFEE & FOOD嘅Facebook專頁啦,有訂購蛋糕流程㗎。

因為無花果季節就快完,原個蛋糕冇得訂,但件裝仲有機會食到,想試純素無花果黑莓撻(HKD68/件)就要快啲去喇!呢款都係用自製素杏仁餡,但就掃上意大利黑醋香料忌廉先鋪無花果乾,香甜中幾清新。

輕食之中又點少得沙律呢!貝殼粉沙律(HKD88)即叫即製,仲用咗大量Superfood,好似藜麥、牛油果、羽衣甘藍、青蘋果同車厘茄等等勁清新,都有飽肚感,好啱OL食。撈埋自家製亞麻籽沙律醬好濃厚,質感幾杰身,味道甜甜哋幾好喎。

想再飽啲仲有Lucy素漢堡配有機羽衣甘藍小沙律(HKD108)。漢堡包用全麥、苔麩同自培酵母製成,係好厚實嘅口感。素牛肉就用黑豆、糙米、藜麥、燕麥同菇菌煮成,同真牛扒嘅質感好似,但豆味香濃。配埋牛油果泥、新鮮蕃茄片、苜蓿同自家製亞麻籽素沙律醬同辣粉,惹味啲,唔食肉都吸收到蛋白質添。

Kale Smoothies(HKD68)用羽衣甘藍、牛油果、香蕉同椰子水整成。第一啖有微微清新草青味,然後香蕉同椰子嘅香甜味會慢慢滲出嚟。口感比奶昔杰身同飽肚,如果運動前後飲杯頂吓肚都得啫。

 

Lucy COFFEE & FOOD
地址:長沙灣保安道55號美寧中心地下C1舖
電話:5508 8318
營業時間:星期二至日:11:00-18:00(逢星期一休息)

You may also like...

Leave a Reply

Your email address will not be published. Required fields are marked *