【網傳「照騙」炸雲吞超誇張 小編實測船麵先至伏】伏務台

小編之前見到有人share呢個「炸雲吞皮」,嘩,原來有餡㗎?乜粒肉仔咁細粒嘅?再睇真啲,餐牌上嘅炸雲吞入面嚿餡好大㗎噃!因咩解究用料慳咁成咁呢?小編決定一探究竟喇!

網友有圖有真相!(中伏飲食報料區fb群組截圖)

呢間泰麵膳喺旺角同尖沙咀都有分店,望落門面企企理理,齋睇外表伏味唔算濃嘅。

小編開頭諗住淨係試個炸雲吞,不過又覺得有啲餓,咁就順便試埋個招牌船麵啦!跟手上網睇睇評價,原來都有唔少網友對佢哋嘅船麵有啲意見喎……

首先上枱係呢杯跟餐上嘅凍檸茶,小編開頭幾surprise凍飲唔需要額外加錢喎,不過飲落口基本上係冇任何檸檬味,紅茶味中仲有淡淡嘅青檸味成陣清潔劑嘅味道飄散,令人好不安……小編試伏多時,真係冇諗過連餐飲都中伏,仲要係大伏。



呢個就係牛肉丸船麵(HKD48)喇,下午茶價錢,其實都偏貴。湯底好深啡,質地偏濃稠,似係慢火熬製,聞落都幾香泰國特色嘅香料味。飲一啖覺得有啲太鹹,第二啖竟然飲到苦味?跟住食啖麵睇吓會唔會好少少啦,嘩,啲麵黐埋一餅嘢咁,要夾硬用兩隻筷子叉開先得。麵係幾掛湯嘅,不過質地又未免太黏喇!頭先聞到嘅香味飲落竟然蕩然無存,好似食緊一大嚿超鹹嘅粉團咁,完全唔知自己食緊咩!


麵唔好食,試吓啲牛肉丸啦。就咁睇外表比較「膠」,咬落完全冇牛味,係一粒正常嘅冇味丸囉。

主角炸雲吞(HKD12/跟下午茶餐)終於上枱喇!望落好似冇網友上次食到嗰嚿「超迷你餡炸雲吞皮」咁誇張喎,通常食炸雲吞,皮同餡比例都係皮比較多少少嘅。

咬咗一啖,嚿肉又真係薄如紙咁……雖然體積變大咗少少,但嚿肉薄到食咗落肚都唔係好覺,同埋個雲吞凍冰冰好似食緊冷盤咁!所以結論係,如果大家下次真係好想食「炸雲吞皮」,先好嗌呢個炸雲吞囉!

 

小編伏氣:今次伏得幾平均,每樣嘢包括埋餐飲都中伏,船麵湯底苦得嚟又鹹,啲粉一餅嘢咁,小編真係食唔落;凍檸茶又有陣清潔劑味;咁最正常係咪個炸雲吞?起碼你當自己食緊炸皮嘅話,其實都幾香口嘅,個甜酸醬都正常,不過嚿嘢都係凍囉!

入伏點:泰麵膳
入伏價:牛肉丸船麵+凍檸茶(HKD48)
炸雲吞(HKD12)

中伏by #肥仔文
美術by #車雲
攝影by #肥仔文

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *