【灣仔巷尾深藏神奇水果 潮食大熱巴西莓果碗】Supabowl

有時食得熱氣脆口嘢多,都想食返啲fresh嘢,不過好似又冇咩清新健康選擇喎(其實飲杯水果茶都落咗好多糖!)……

今次小編想同大家介紹灣仔汕頭街嘅Supabowl!舖頭喺街尾,真係少啲眼力都搵唔到呀!老闆Danny之所以想喺香港做Acai Bowl(巴西莓果碗),係源於一次同女朋友去夏威夷,覺得當地流行嘅Acai Bowl好食又健康,所以決定將呢款始於巴西嘅健康小食帶嚟香港!

OLYMPUS DIGITAL CAMERA

最招牌嘅「Bowl」當然係同店名同名嘅Supabowl(HKD56/medium size)啦!”Supa”取”Super”諧音,因為Supabowl入面嘅生果全部都係精選過嘅Superfood!特別係來自巴西嘅巴西莓(Acai Berry),呢種果實喺當地飲食文化流行咗好多年㗎喇,被譽為係神奇水果!據知巴西莓除咗有豐富嘅抗氧化成分,仲可以幫助增強免疫力、對抗衰老、心臟疾病、降低膽固醇,仲可以美白肌膚添!外表有啲似藍莓,但質感比較特別,有啲硬身,需要咀嚼耐少少,酸酸甜甜好開胃。

Cocobowl(HKD80/one size)相當吸睛,用椰子碗裝住巴西莓、士多啤梨、藍莓、香蕉、椰子片同南瓜籽,賣相超靚;而且用椰子碗代替用膠碗就夠晒環保添!Danny話會建議客人將椰子碗帶返屋企,因為碗底嘅椰肉可以用刀起出嚟做椰子片,做小食一流呀!

Firebowl(HKD56/medium size)亦相當受歡迎,用紅肉火龍果色做底,靚得嚟又健康,因為比一般白肉火龍果多咗「甜菜紅素」,具抗氧化作用,貪靚嘅女仔們一定要試吓喇!同埋紅肉火龍果一般都比白肉甜,難得一遇嘅健康甜食,食幾多都唔會有罪惡感啦!

Danny話一直都好想喺香港推廣吓健康文化,最近佢就嘗試搞咗個「挑戰」!只要你喺舖頭出面做夠20吓深蹲就可以免費加多一份Topping、做夠30吓就可以免費加自家製杏仁醬,味道同質感有少少似花生醬,更加香滑美味!店內更有一個排行榜,紀錄住做深蹲做得最多次嘅客人,目前排第一嘅Maggie可以一口氣做653吓!真係好勁呀!大家有冇信心去挑戰吓呢?

Supabowl
地址:灣仔汕頭街4號
電話:3565 4379
營業時間:星期二至日:09:30-19:00

You may also like...

Leave a Reply

Your email address will not be published. Required fields are marked *