【破格火車主題餐廳 Tasting Menu歎6款菜最吸睛】CHOO CHOO

長沙灣工業大廈、車廠雲集,好少人會選擇特登去嗰頭搵食。不過最近小編就見到順寧道嘅盡頭有間同周圍有少少格格不入嘅西式餐廳喎,就係呢間CHOO CHOO喇!裝修望落幾摩登吓,唔係好似工廠區格局喎。

一入到去就見到充滿歐陸風格嘅枱枱櫈櫈,枱上嘅餐牌好似一本旅遊手帳咁,打開又真係見到幾位老闆去旅行時候嘅相呀、車票呀等等,真係幾有真實感喎。一路揭住本餐牌,除咗睇到好多唔同款式嘅美食之外,仲感受到一陣出走嘅氣息。店名CHOO CHOO就係以舊式蒸氣火車行走時發出嘅「CHOO CHOO」聲而命名,餐廳格局佈置到好似火車車廂咁樣,好有feel。

牆上嘅顯示屏上見到嘅並唔係風景圖片,而係不停咁播「車窗外」嘅風景,開頭小編仲好奇究竟喺邊度搵咁多風景Source返嚟,點知原來全部都係老闆們親自去旅行嘅時候影㗎!幾位Partner結伴一齊去旅行其中一樣好重要嘅任務,就係搭長途火車Set Cam拍片。老闆話好想客人一路用餐嘅時候可以感受到嗰種好似去緊旅行嘅感覺,拍呢啲片聽落好簡單但其實真一啲都唔易㗎!老闆兼大廚之一阿Kei就話:「自己想做囉,做到自己想做嘅嘢就開心。可能中間有啲辛苦,但都係一個難得嘅經歷嚟。」

餐廳最近推出咗Tasting Menu(HKD388/每位),總共6道菜,包兩個頭盤、凍湯、兩個主菜同甜品。Menu係大廚阿Kei啱啱去完西班牙之後設計出嚟嘅,頭盤已經有風乾36個月嘅西班牙黑毛豬配溫室蜜瓜。Parma ham配蜜瓜是常識吧,呢個HAM鹹乾得嚟相當有咬口,配埋鮮甜多汁嘅蜜瓜簡直係Perfect Match!食之前點埋伴碟嘅蜜糖泡泡就更加夾喇!

另外士多啤梨凍湯亦相當特別,平時喺香港比較少機會接觸到凍湯。今次呢個凍湯除咗味道特別,賣相亦非常吸睛!一上碟就煙霧彌漫,仙境咁款喎!凍湯飲落杰杰哋,酸酸甜甜意外好味得嚟又開胃。湯嘅分量係兩人一小碗,唔怕分量太多飲唔晒啊。

不得不提係西班牙豬肋排(全橡級別)配香草甜薯,全橡級別意思即係隻西班牙豬由出世開始直到變成豬肋排之前都只係食橡果,咁樣會令到佢嘅肉質嫩滑、有陣獨特嘅榛子果香,由於長期食橡果為生嘅關係,呢種豬嘅脂肪會分佈成好似大理石紋咁。唔好以為肥豬肉就一定唔健康,全橡級別嘅黑毛豬脂肪主要係不飽和脂肪酸,所以營養價值同橄欖油差唔多,一啲都唔Heavy!豬肋排嘅底下舖滿甜蕃薯,有解膩效果。

除咗Tasting Menu包嘅主菜之外,阿Kei仲額外向小編推介一個Main Course,就係蒜香蝦意大利麵配風乾蕃茄龍蝦醬(HKD88)喇!一上枱就已經聞到陣陣嘅香味,蒜香蝦超入味,連蝦頭啲汁都要啜埋呀。意粉襯蕃茄龍蝦醬惹味得嚟,每一啖都食到一種異國風情。

當然唔少得食返個甜品啦,Winter Wish除咗樣靚之外味道都相當特別。小編以為面頭放咗塊類似蜂巢塊嘅物體就一定係有啲蜜糖味,點知原來蜂巢上橙色嘅點綴係熱情果醬,而雪人身體嘅組成則係乳酪雪糕;伴碟嘅白色雪狀粒粒就係急凍乾乳酪,配搭令人Surprise喎!

除咗Tasting menu包嘅Winter Wish之外,Gold Rush(HKD98)亦係Kei嘅獨家招牌甜品之一。望落好似係一嚿嚿硬繃繃嘅朱古力,但其實係慕絲蛋糕!食落有少少朱古力味,甜而不膩,分量小巧精緻,啱晒各位小鳥胃嘅女仔呀!左下角好似金箔朱古力嘅其實係啫喱,呢個甜品簡直衝擊小編視覺同味覺。Kei話呢個甜品係啟發自身為國際金融都市嘅「香港」,一眼望落去五光十色,非常之華麗璀璨,人人表面望落如鋼鐵甚至黃金咁無堅不摧,但其實內心都好柔軟,充滿令人驚喜嘅特點。真係好鬼有深度㗎啫,我Buy呀!你又Buy唔Buy呢?

 

CHOO CHOO
地址:長沙灣順寧道364-368號昌暉大廈地下1號舖
電話:3707 1034
營業時間:星期一至日:12:00-15:00;18:00-22:00

You may also like...

Leave a Reply

Your email address will not be published. Required fields are marked *