【Mott 32摩登中菜姊妹店 口水和牛夾西瓜咁都得?】莊館

中環出名食片皮鴨嘅Mott 32,最近喺銅鑼灣開咗間親民版姊妹店莊館,菜式設計亦傾向精緻啲,兩、三個人嚟食都可以試多幾款。餐廳另一個特別之處係酒吧,唔單止收藏逾400枝琴酒,中間嘅4枝大型琴酒柱,每枝裝滿自家釀製嘅琴酒添,真係chill住食,chill住飲囉。不過入到去先揀個靚位,因為餐廳每個角落都大玩摩登feel,想打卡影靚相都可以有唔同感覺。

大廳有啲似酒店大堂,座位設計隨意啲,俾人悠閒嘅感覺。同酒吧相連,叫啲小食飲兩杯幾寫意。

大廳左邊感覺古典啲,卡位設計模仿舊式火車箱。

當然大枱都係唔少得嘅,間開位置,私人空間感重啲。睇完環境,係時候開餐喇!

滿缸紅(HKD220)雖然紅卜卜,其實唔係好辣,仲有啲清甜慢慢滲出嚟。羊肉用番紅花天然顏色染紅,再以蔬菜汁醃,令口感非常鬆軟易咬。最好係冇咩羶味,令怕羶嘅朋友都食到。墊底嘅麵包脆脆都不容忽視,乾身又唔油,就咁食都好味。

口水雞食得多,但隨咗雞仲可以配咩?慢煮口水和牛面頰(HKD135)就嚟個大突破,亦係小編至愛呀!和牛面頰慢煮過後好軟腍,肉之間又有啲類似牛𦟌嘅爽口筋腱,口感層次豐富。而最特別嘅係夾西瓜一齊食味道好夾,咬落爆出嚟嘅清甜果汁減退口水汁嘅油膩感,令辣味更有層次。

叉燒俾人嘅印象就係用豬肉做,但莊館就選用和牛喎!澳洲和牛叉燒(HKD280)口感一啲都唔覺油膩,因為澳洲和牛油膩比日本和牛少啲。肉味唔算好重,質感仲比平時食嘅叉燒鬆化啲。仲特別將薑蓉打勻溝埋一齊,方便食嘅時候完全點到蔥同薑,味道平衡啲。

中式點心之中,腸粉係必食之選,而且莊館嘅點心全部每朝新鮮自家製,咁就更加要食啦。軟殼脆蟹腸粉(HKD115)以坊間嘅春風得意腸為靈感,但餡料轉用炸軟殼蟹。睇落好似唔係好嚿,點知一啖入口係會塞滿咀,但啖啖肉真係好正!

墨汁小籠包(HKD65)唔止將餡料都轉用全海鮮,混合彈牙嘅手打蝦膠、墨魚膠同少少菇菌。連湯都係墨魚湯添,鮮甜味道令人想一食再食。

頭先提過莊館有自家釀製嘅琴酒,分別係薰衣草、菊花、風乾蕃茄同煎茶。想清新啲不妨試TANGERINE & CHRYSANTHEMUM(HKD145),呢杯Gin & Tonics有菊花琴酒、橘子普洱茶、枸杞同Fever Tree Aromatic Tonic,味道好似菊花茶加輕量酒精咁,fresh嘅感覺就咁飲又得,當餐酒亦得啫。

 

莊館
地址:銅鑼灣新寧道1號利園三期B1樓B01-B10號舖
電話:2327 1398
營業時間:星期一至日:12:00-15:00,18:00-22:30

You may also like...

Leave a Reply

Your email address will not be published. Required fields are marked *