【旺中新店首創魚蛋佬雲吞 廿蚊12條鬼馬雙拼係咩?】平霸

旺中簡直係平價天堂啦,除咗有衫賣,好食西都係不可缺少嘅一環。依家愈來愈多食店進駐,平霸覺得直頭係九龍版葵廣咁喎,九龍人唔使去葵芳咁遠喇!今次平霸喺旺中搵到寶,就係魚蛋佬喇!

開喺旺中二樓,雖然舖頭細細,但係好sharp嘅黃色招牌一睇就知係佢,加上店舖貼滿餐單,食物相都影到好吸引呢,見到都想試晒咁多款呀!

魚蛋佬雲吞(HKD15/5粒),話係全港首創,外脆內彈,睇落賣相好似好特別!

聞落好重黑椒味,雲吞上面灑滿調味粉,食落會有少少辣,幾過癮㗎!

雲吞皮炸到脆卜卜,好似食緊薯片咁,比起出面食開嘅雲吞皮更香脆。

入面嘅「雲吞餡」,平霸覺得似係魚蛋,成嚿放晒落口真係外脆內軟,夠晒彈牙!不過略嫌調味粉落得有啲重手,食完2、3嚿覺得有啲鹹,如果大家想試就要叫老細落小啲調味粉喇!

另外有個鬼馬豬柳墨魚條(HKD20/12條),有得雙拼添,一次過滿足晒二個願望,掂呀!size啱啱好一口食一條,超方便呀!

鬼馬條上面同樣都有灑上調味料,墨魚條食落非常之彈牙,完全係墨魚丸嘅長條版,小食嚟講絕對有驚喜。

口感唔似有啲墨魚丸咁煮耐咗會變到好腍身,呢個條條都咁彈牙,唔想食燒賣魚蛋不如試吓呢個啦。

豬柳條口感就好似食緊豬肉咁,開頭平霸以為同麥記豬柳漢堡差唔多口感,點知質感更加厚實,一條接一條,食吓食吓好快清晒。

 

平霸小評:每次同朋友行街,一定要買返啲小食,一路一路食先夠滋味!唔好再食魚蛋燒賣喇,不如試吓新嘢,食返條鬼馬條先啦!

魚蛋佬
地址:旺角彌敦道688號旺角中心一期2樓SB05舖
營業時間:星期一至日:12:30 – 23:00

《平霸》平食四方,歡迎各界報料。

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *