【客人掃光免費飲品吧 店主停服務:貪念更恐怖!】食焦

大嘥鬼有、自私鬼有、貪心鬼都有唔少喺左近㗎!一講到免費梗係吸引啦,但係貪到掃光晒人哋舖頭啲嘢,同偷有咩分別呢?最近銅鑼灣嘅日式生活百貨店SECRET CORNER,喺專頁度貼咗張黑白相,仲寫住「GOODBYE……香港不配有你存在」,搞到差啲以為佢哋要結業添!

就咁一張黑白相再配埋呢個GOODBYE字,唔睇上文下理真係以為成間店要bye bye呀!(SECRET CORNER fb專頁圖片)

新加嘅蘑菇湯都冇埋!(SECRET CORNER fb專頁截圖)

嗰張黑白相其實係舖頭入面嘅drink bar角落,搞到店主要急停呢個drink bar服務,就係因為有客人將吧枱上面嘅嘢幾乎全部掃光,嗰啲仲係店主從日本帶返嚟嘅紅茶包、咖啡、砂糖,連盒裝紙巾都唔放過,新加嘅蘑菇湯都擸埋!成個過程俾店內嘅閉路電視全程拍低,店主睇到呢啲畫面真係慘不忍睹啦!

事發日期係2018年10月17日,約1840時間,有老閉就清楚啦!(SECRET CORNER fb專頁截圖)

「最後一位享用人」。(SECRET CORNER fb專頁截圖)

心痛又激心嘅店主,隨即喺專頁宣布停止drink bar服務,仲將「最後一位享用人」嘅打格低清片放埋上專頁,條片入面見到一位貌似上了年紀嘅女士,喺drink bar位置雙手向茶包位進發,跟住又放落自己個黑色大袋咁樣!網民同熟客見到都紛紛留言,叫店主要報警處理,絕對唔可以容忍呢啲咁貪心嘅「偷嘢」行為!

貪貪貪!(SECRET CORNER fb專頁截圖)

未享用過就已經再冇機會喇!(SECRET CORNER fb專頁截圖)

店主忍痛停止服務,仲話原先一心諗住將日本盛行嘅drink bar免費飲品吧服務引入香港,點知落得如此下場,可見香港地真係不配有drink bar嘅存在!而其實小店唔係第一次發生同類事件喇,舊年12月drink bar有三個籃入面嘅飲品,每星期總會全數「失蹤」,甚至連瓷杯碟餐具都俾人偷埋。難怪店主心痛話「雖然d飲品、蘑菇湯、砂糖、紙巾唔值錢,正正因為唔值錢,映襯人嘅貪念更加恐怖……」唔好咁貪得唔得!

出事地點喺銅鑼灣店。(SECRET CORNER fb專頁圖片)

冇咗drink bar,都仲有locker服務!(SECRET CORNER fb專頁截圖)

You may also like...

Leave a Reply

Your email address will not be published. Required fields are marked *