【秋冬皮膚乾燥要潤吓 營養師推介三大低卡湯水 】懶健康貼士

秋天涼浸浸係好,但就皮膚乾囉,連My Fitness嘅營養師Moses都話參加瘦身計畫嘅同學仔成日呻:「覺得喉嚨乾乾哋,連嘴唇都爆拆。想煲啲入秋湯水滋潤吓,但又驚飲咗高卡湯水得不償失,浪費之前嘅努力呀!」

「之前有客人同我講佢日日都飲媽媽煲嘅愛心靚湯,好似蓮藕排骨湯、香菇燉雞湯,仲連湯渣都掃清,話咁先可以完全吸收晒啲營養,結果就梗係體重上升啦。其實飲湯水會唔會增體重取決於用咩肉煲湯!例如以100克重量計算,豬排骨嘅熱量大約208卡路里,瘦肉就係101卡路里,前者係後者兩倍㗎;如果睇脂肪比重,豬排骨有14.7克,瘦肉只有1.1克,加上肉嘅脂肪喺煮嘅過程會釋放出嚟,會令湯水增加額外嘅熱量添。」

營養師推介低卡湯水

「我哋可以用水果入饌,蘋果、雪梨、木瓜、無花果都可以,再配搭瘦嘅肉類,魚片、豬腱、瘦肉,加啲豆類都得,咁都可以減少油脂。下面有三個湯水推介俾大家,不過水果本身有糖分,需要控制血糖或節食緊嘅朋友就要留意分量喇。想知咩肉肥咩肉瘦,睇埋個表參考吓啦。」

資料來源:食物安全中心營養資料查詢系統。(NA:冇相關資料)

雪梨蓮藕瘦肉湯

效果:雪梨生津潤燥,幫助舒緩喉嚨乾涸,而且含有豐富嘅纖維,仲幫助防止便秘㗎。

材料:
蓮藕 – 1斤
雪梨 – 2個
瘦肉 – 半斤
紅棗 – 少許

做法:

1. 將所有材料洗淨,蓮藕去皮切塊;雪梨連皮去芯切塊,瘦肉汆水。

2. 用煲裝約6-7碗水,將全部材料放入煲,水滾後轉文火煮約1.5小時後落鹽調味就飲得。

羅漢果西洋菜豬𦟌湯

效果:羅漢果生津潤喉;西洋菜屬深綠葉菜,含有豐富嘅維他命 A同C,可以幫助保持肌膚健康,而豬𦟌嘅脂肪含量亦較低。

材料:
西洋菜 – 1斤
豬𦟌 – 半斤
南杏,北杏 – 少量
羅漢果 – 1/2個

做法:

1. 將豬𦟌洗淨汆水;西洋菜加鹽浸洗;南杏,北杏用熱水浸十五分鐘;羅漢果洗淨備用。

2. 用煲裝約6-7碗水,將羅漢果、南杏北杏放入鍋內煲滾。

3. 再放入豬𦟌、西洋菜,煲滾後轉文火煲2小時後落鹽調味就飲得。

無花果白菜乾豬𦟌湯

效果:無花果低卡高纖,潤腸通便,2個無花果仲等於一份水果添。

材料:

白菜乾 – 4-5棵
乾無花果 – 4-5粒
豬𦟌 – 半斤
南杏,北杏 – 少量
紅蘿蔔 – 半條

做法:

1. 白菜乾浸開後剪去莖部同清洗砂泥;豬𦟌汆水。

2. 裝2公升水,將白菜乾以外嘅材料放落煲,煲滾後改文火煲約3.5小時。

3. 最後加入白菜煲再1.5小時後落鹽調味就飲得。

 

小提醒:

– 煲湯前將肉類汆水可以減少湯中嘅脂肪。

– 煲湯後可使用隔油壺隔走油份。

 

Moses Lee

現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

You may also like...

Leave a Reply

Your email address will not be published. Required fields are marked *