【咖喱飯盒驚現不明生物頭? 網友全家嚇到嘔急報食環】食焦

真係睇見張相都嘩嘩聲呀!加料唔係加到咁吓嘛?有網友喺連登開po「[求救] 飯盒入面有不知明生物」,有埋大大張相,嗰盒咖喱牛腩外賣飯盒,入面真係有隻不明生物頭嘅物體喎,擺明唔會係牛腩啦!樓主話「有冇人知係咩嚟 睇落個皮似爬行動物 仲要錫左佢一啖先見到」!

正面睇係咁嘅,大家話呢個係咩喇?(連登截圖)

打側睇係咁嘅!(連登圖片)

錫咗啖先發現都好過食咗落肚都唔知呀!(連登圖片)

睇到張咁鬼恐怖嘅相,成班高登仔即刻起哄啦,除咗講核突核突核突之外,個個都發揮靠估精神,有人話係蜥蜴,亦有唔少人話係蛤蚧,即係大壁虎喎,網友仲熱心到專家上身一樣,列舉埋蛤蚧嘅功效,係乜呢?原來可以「治療陽痿。主治腎陽不足、精血虧虛而致的陽萎……」哦!

嘩,咁大個口好恐怖呀!(連登圖片)

補還補,但點會咁食落肚呢?(連登截圖)

又有唔少網友貼埋好多蛤蚧相出嚟,講晒藥用功效,有啲仲話會用喺滷水度喎,真係唔講唔知喎!至於苦主就話自己屋企人都嚇到嘔,網友叫佢要報食環,苦主都話已經報咗喇!當然亦都有人叫佢留言開名係邊間舖頭,不過佢就冇開名喇,苦主只係話呢盒恐怖外賣係來自屯門工業區嘅茶記喎!

連登冷知識系列!(連登截圖)

網友幾咁熱心po相!(連登截圖)

其實就咁睇張相,的確係一個疑似不明生物嘅頭出現嘅,似爬行類動物,你話係蜥蜴又得、蛤蚧又得,反正一日冇攞去化驗,一日都唔會知真相喇!之後亦有網民追問事情發展,不過樓主就好似潛咗水咁冇晒反應喎!驗咗咩未知,但肯定以後對任何咖喱類食物都有陰影喇!

咁點解出現喺咖喱度呢? (連登截圖)

好難唔嚇到嘔啦!(連登截圖)

You may also like...

Leave a Reply

Your email address will not be published. Required fields are marked *