【尖沙咀上樓素食餐廳 鮮蔬批素蟹鉗中西合璧】素學堂

做生意當然搵錢重要,但係有時都想賺得更有意義嘅!尖沙咀Tasty Veggie老闆賴小姐本身一家都食素,眼見自家經營嘅寶石生意上咗軌道,上年底決定開一間少鹽少油為主嘅素食餐廳,希望有個大啲嘅廚房,煮多啲素菜可以派飯。依家每月有兩次去荃灣派素飯盒俾基層長者,佢仲親力親為入埋廚房一齊煮添。

樓上店可以望到九龍公園,望住綠油油景色食素菜好啱feel,而且日式木傢俬仲好有家嘅感覺添。小菜平均HKD100-HKD150,分量都好足㗎。

意大利鮮蔬批(HKD128)色香味俱全,有意大利青瓜、意大利黃瓜同甘荀,切到薄一薄捲起,小編覺得比生日蛋糕仲靚囉。撻底日日新鮮自家製,所以限量供應,味道甜甜哋極脆口。撻底仲有層薄薄嘅蛋,同蔬菜嘅清甜加埋一齊食唔會好滯。

藜麥啡菇素漢堡配薯條(HKD98)再加素芝士(HKD12),漢堡肉用薯仔、藜麥、紅腰豆同粟米搓成餅再炸,成層豬仔包咁厚都仲好軟熟,真係睇見都飽。夾埋烤大菇咬落多汁,令漢堡唔會太乾;包面有芝麻,烘過後更香。男士食完一定飽,女士就建議2個人share食喇。

鮮茄菇粒鮮蔬意大利飯(HKD118)嘅茄醬都係自家製,用新鮮蕃茄打成,濃厚鮮茄味好fresh。餸料仲落咗勁多車厘茄同蘑菇,撈埋芝士就更加香。飯用意大利長身嘅米煮,幾有咬口。

如果偏好中式素食,小編絕對推介呢個扮咕嚕肉嘅糖醋猴頭菇(HKD128)!將猴頭菇由浸發、清洗再炸,口感超彈牙;炸粉唔厚,唔會吸好多油同唔易食滯,加埋酸甜度適中嘅糖醋汁好開胃。

造型神似嘅百花素蟹鉗(HKD88/4件)連鉗都食得,因為鉗係人手用腐皮整㗎!「蟹肉」嘅味道、質感就同素漢堡嘅漢堡肉好似,不過配酸甜汁又係另一種感覺。

 

Tasty Veggie
地址:尖沙咀海防道38-40號中達大廈7樓全層
電話:5396 9288
營業時間:星期一至六:12:00-16:00,18:00-22:00(星期日休息)

You may also like...

Leave a Reply

Your email address will not be published. Required fields are marked *