【樓上café開3D拉花班 組隊DIY又玩又食暖笠笠】笠笠咖啡

咖啡店嘅吸引位,唔少得一杯立體拉花咖啡,見到啲公仔喺咖啡上面搖吓搖吓真係好治癒㗎!旺角嘅笠笠咖啡,既係咖啡店又係工作坊,有唔同嘅workshop俾大家參加,食客可以一齊親手DIY屬於自己嘅飲品/食物,同時亦有提供餐飲服務。笠笠咖啡以「DIY」為目標,宣揚咖啡背後嘅文化!由Ting同Touei一同創辦,2015年成立咖啡工作室,提供咖啡同拉花教學工作。   

笠笠咖啡以前喺火炭嘅工廈開業,經營咗一段時間想擴大火炭嘅咖啡工作室,因為想同更多客人互動同接觸,所以決定由火炭工廠區搬出熱鬧嘅旺角區。兩位年輕嘅老闆希望打造一間無拘無束嘅咖啡工作室,等大家可以接觸到咖啡藝術。兩人好著重飲品質素,特別選用優質新鮮自家烘焙嘅咖啡豆同材料,不論店內沖調同課堂教學都可以享受到高質嘅飲料。

餐廳名都好有心思㗎,因為咖啡都係一粒粒,又想帶點溫暖感覺俾客人,「笠笠」又同英文Love Love發音相似,所以就決定取名為笠笠咖啡Lov Lov Coffee。

小編當日就join咗幾個workshop,每個都好好玩!DIY 2D Coffee卡通畫花工作坊 (HKD80/1人),包飲品一杯,畫花工具同材料;一共有8款味道可供選擇,如屬初學者,導師會推薦返咖啡口味。

導師會示範一次做法同過程,之後就輪到自家發揮喇!2D Coffee比較考畫功,聽日就到萬聖節,梗係要畫返隻吸血鬼應吓節啦!

DIY 3D Coffee卡通畫花工作坊(HKD120/1人),其實做法都係同2D Coffee差不多,不過呢款就啱啲畫功冇咁好嘅朋友仔喇,利用奶泡慢慢將公仔由冇變有,成個過程真係好神奇!

同一班朋友一齊上嚟又玩又食啱晒!

DIY自製卡通Tea Set(HKD288/2人),包兩杯2D畫花咖啡同卡通熱香餅。熱香餅要自己一筆筆咁畫出來,少啲心機都唔得呀!見到最後成品出嚟個吓,幾有成功感呢!

不過如果第一次玩,可能力度同技巧方面會控制得冇咁好,記住要叫導師幫吓手呀!

上完堂,應該肚餓喇,不如試吓餐廳嘅食物啦!汁燒雞扒蘑菇意大利包伴薯菜(HKD66)!雞扒非常入味,唔會太嚡口仲幾嫩滑!蘑菇分量都多,配埋醬汁一齊食唔會好乾身呀!

芝士肉醬薯條(HKD36)芝士加埋邪惡肉醬,分量一啲都唔嘢少,食完都飽咗7成咯!

最後甜品係提拉米蘇木糠布甸(HKD36)入口即溶咁滯呀!

笠笠咖啡
地址:旺角彌敦道691-697號永如大廈3樓697室

電話:9468 3617
營業時間:星期一至三及星期五:12:00-20:00;星期六至日:12:00-18:00(星期四休息)

You may also like...

Leave a Reply

Your email address will not be published. Required fields are marked *