【懷舊冬菇亭街坊食堂 咖喱炸髀飯食過人人讚】街霸

依家香港啲冬菇亭大排檔都拆得七七八八,小編今次就為大家介紹呢個位於沙田沙角邨碩果僅存嘅冬菇亭熟食市場入面嘅劉萬利咖啡美食

雖然呢度冇冷氣,夏天嚟食飯可能會食到一身汗,不過街霸就覺得呢種大排檔風味好正,呢排秋高氣爽嚟感受吓確係唔錯!

首先試吓沙角邨街坊推介嘅蕃茄蛋治(HKD14),街霸發覺好似每個茶檔都有自己招牌嘅三文治,好似跑馬地昌記有魚片蛋治,而呢度就有蕃茄蛋治。唔好睇呢個蛋治好似好流咁呀,其實炒蛋炒得啱啱好,又滑又食到有蛋汁,唔會炒到乾晒咁樣,夾埋新鮮蕃茄係幾醒神嘅。

另外公司三文治(HKD33)亦係唔少街坊嘅至愛!平時公司三文治最常見嘅材料有煎蛋、蕃茄、煙肉、生菜,而劉萬利版嘅公司治就有齊厚炒蛋、午餐肉、火腿、蕃茄、醃青瓜同埋鹹牛肉!呢個多肉公司治真係好滿到食肉獸嘅胃口,食完絕對唔會覺得空虛!

眾多選擇中,最邪惡莫過於呢個咖喱炸髀飯(HKD41)。正所謂「雞髀打人牙骹軟」,相信無論大人定小朋友,大家都鍾意食脆卜卜嘅炸雞髀。雖然又咖喱又炸髀好有罪惡感,不過一場嚟到點都要試吓嘅!咖喱濃郁微辣,薯仔入晒味之餘仲要超級腍,煮呢煲咖喱應該都用咗唔少時間同心機呀!雖然飯量望落好多,大約係平時嘅2-3個飯碗左右,不過呢個咖喱用嚟撈飯簡直一流,唔經唔覺就清晒盤囉!

隻雞髀超贅手,體積仲大過我隻手掌呀!真係超足料,即叫即炸熱辣辣,睇見都想咬返啖呀!

一切開啲肉汁就爆晒出嚟,雞皮脆口油香十足,髀肉嫩滑一啲都唔老,而且皮同肉唔會天一半地一半咁,淨講雞髀已經滿分喇!

最後試埋侍應姐推介嘅檀島咖啡(HKD16),雖然街霸未飲過灣仔好出名嗰間「檀島」啲咖啡,但係呢杯咖啡確係超香濃。唔係平時茶餐廳用咖啡粉開出嚟嗰種味道,飲落帶點醇厚,雖然係凍啡但咖啡味依然濃郁,微微嘅咖啡苦澀味中帶微酸。鍾意飲港式咖啡嘅朋友應該幾buy,因為飲完成個口都係香香嘅咖啡味,大讚!

 

街霸最愛:今集最愛就係咖喱炸髀飯喇!因為出面好多聲稱自己係專賣炸雞嘅舖頭都未必做到呢個水準,即叫即炸,皮脆肉滑仲要超大隻,加埋惹味咖喱飯真係冇得頂呀!雖然望望自己個腩仔有罪惡感,但街霸覺得為咗呢個炸髀飯真係要豁出去!信我啦,真係食過返尋味呀!

劉萬利咖啡粉麵燒臘飯
地址:沙田沙角邨熟食中心7-9號
電話:2648 7128
營業時間:星期一至日:06:15-01:30

You may also like...

Leave a Reply

Your email address will not be published. Required fields are marked *