【台灣幸福堂懷疑港店貨源 出聲明叫香港粉絲唔好飲】食焦

港台兩邊嘅幸福堂之前嘅爭拗都仲未有共識,最近又爆出風波喇!由9月尾台灣總店出聲明話香港代理未按照合約規範內容經營開始,雙方都一直招來招往(重溫連結:https://goo.gl/Z3ZrjW),香港代理唔理咁多,繼續招收加盟店,依家銅鑼灣、元朗同月初喺尖沙咀開嘅新店,短時間内開足3間。

台灣總店真係好鬼鍾意出聲明,耐唔時又見佢發功喇,最新呢個聲明就係叫香港粉絲暫時停飲港店貨喇!(台灣幸福堂fb專頁圖片)

另一個重點當然係公佈嚟緊會自己喺香港開直營店啦!(台灣幸福堂fb專頁截圖)

總店喺星期一近5點嗰陣再出新po,以「香港代理恐失代理權」為題,再講多次港店嘅貨源來歷不明,仲話港店已經有2個月冇經總店入貨喇!(台灣幸福堂fb專頁圖片)

台灣總店上星期五喺專頁出聲明,話收到香港客人話港店品質下降,同埋味道同台灣店差好遠嘅說法,於是總店特地派員視察,得出結論係懷疑港店嘅貨源出問題喎,「可能不是來自台灣幸福堂,包括珍珠、茶葉 及黑糖,若此懷疑屬實,總公司十分擔心出品的品質,並懷疑其貨源的可信性……」(係懷疑咋吓!)仲話擔心相關食材會引起食安問題添!

原材料對比照,不過就咁睇,兩邊貨樣嘅包裝確係兩回事!(台灣幸福堂fb專頁圖片)

檢驗報告都出埋!(台灣幸福堂fb專頁圖片)

重點嚟喇,總店話喺逼不得已嘅情況下,「請台灣幸福堂香港粉絲暫時不要飲用現在香港區的飲品」!仲未完㗎,重中之重係,原來總店已經自己籌備緊香港直營店,講埋會喺尖沙咀同旺角開店,「將會在2019年第一季開幕」!

唔少得梗係要sell吓自家新出品啦,咁港店係咪唔會再有呢啲新品出現呢?(台灣幸福堂fb專頁圖片)

正式擘面搞到自己開直營店,無非都係唔想再益香港代理啦!總店出咗呢個「停飲聲明」之後,香港代理終於喺星期二(20日)喺報章刊出聲明,話總店不斷抬高原材料價錢,又單方面延長發貨期,而香港代理亦於11月13日向總店終止代理合約,聲言保留索償一切損失之權利,據理力爭,仲話會奉陪到底咁話!

香港代理星期二喺報章刊出聲明反擊,而喺自家專頁就話尖沙咀店開業以來一直受到各方喜愛,「又達到過千杯的成績,多謝各位粉絲堅定的支持!」(香港幸福堂fb專頁截圖)

其實香港代理曾經喺上個月po過向台灣總公司攞貨嘅訂貨單出嚟!最新嘅反擊聲明就話總店不斷抬高原材料價錢喎!(香港幸福堂fb專頁截圖)

You may also like...

Leave a Reply

Your email address will not be published. Required fields are marked *