【跑馬地蓮園開姊妹店 粥麵keep水準小炒夠鑊氣】蓮苑

賣粥麵出名之餘,又以寸同惡聞名嘅跑馬地蓮園霸氣老闆娘霞姐陳麗霞,終於喺尖沙咀開咗姊妹店蓮苑,全因為俾廿幾年熟客Nicholas嘅誠意打動。話說本身做開時裝生意嘅Nicholas,一直同日本有業務連繫,咁啱霞姐又想將品牌發展到日本,咁就一拍即合?Nicholas話都要花啲時間說服霞姐接受新意見㗎,好似蓮苑嘅餐牌同總店分別唔大,但加咗下午茶餐(冇加一),遲啲再慢慢加新菜式。不過點發展都好,霞姐都係想保持一貫嘅食物水準,所以蓮苑開店之前,新店師傅都有同霞姐交流,而依家霞姐又會不定時去蓮苑試味!味道如何?依家輪到小編試喇!

餐廳大部份座位都喺開放式環境,不過同喺商場行街嘅人距離唔會好近,都算舒服。

清湯腩雲吞麵(HKD78)睇落細細碗?真係唔好俾佢呃咗,食完都幾飽!食麵之前當然先飲啖湯,湯底改良咗少少,用鮮蝦殼、乾蝦、大地魚同上湯骨等材料熬製,濃郁嘅鮮甜味令人想成碗飲晒囉。麵質爽彈唔易發脹,有輕微鹼水味,都可以接受。蘿蔔煮得好晶瑩剔透,清甜又冇渣㗎!

每粒鮮蝦雲吞都有一大隻完整鮮蝦,啖啖肉非常爽口。厚切牛腩都同樣出色,質感喺爽同腍之間又夠肉味。提提大家一定要配埋炸冬菜一齊食,味道會更加甘香㗎。

另一個必食推介係狀元及第粥(HKD50),可以揀單拼、雙拼或三拼,如果唔揀就有齊豬膶、豬腰、豬肚、生腸同鮮肉丸,小編當然試晒咁多款啦!本來以為全部有齊就會每款得1-2件,點知都有3-4件喎!粥底好綿密香滑,依家凍凍哋食啱晒。

配料好新鮮,生腸同豬膶都好爽口,鍾意食內臟嘅朋友萬勿錯過!

跟住到小菜喇,玫瑰豉油雞(HKD88/例)用醬汁慢慢浸熟,令肉質保持嫩滑,入味又唔會過鹹,玫瑰露嘅香味會慢慢滲出嚟。無咩肥膏,食少少雞皮都唔會好罪惡感。

蓮苑幾著重小炒菜式,滑蛋炒蝦仁(HKD128)快炒夠鑊氣,保留啲蛋汁令入口更滑嫩。雖然價錢唔算平,但都可以三至四個人食㗎,事關非常足料!小編粗略數過,爽口鮮蝦有十隻以上!

最尾當然食甜品啦,梗係唔少得點返個跑馬地蓮園嘅名物啦!小編建議可以先叫一份懷舊嘅蓮蓉西米焗布甸(HKD40)兩個人share食,真係唔夠先再order,因為中間有層自家製白蓮蓉做餡,會甜啲膩啲。西米好足料,入口滑兼有咬口,食完個人暖笠笠好正。

俾個下午茶menu大家參考。

 

蓮苑
地址:尖沙咀河內道18號K11購物藝術館地庫2樓B232號舖
電話:2336 9890
營業時間:星期一至日:11:00-22:30

You may also like...

Leave a Reply

Your email address will not be published. Required fields are marked *