【前DJ怒數唔尊重食客 鏞記$100燒鵝麵掀網戰】食焦

成百蚊食碗麵仲要食到一肚氣,今次就係為咗碗燒鵝麵喇!不過估唔到因為咁反而惹咗唔少網民惡言啫!前港台DJ何嘉麗喺自己專頁度出po,話去鏞記食燒鵝麵食到火都嚟,仲話「簡直覺得係俾鏞記羞辱!」,好激動呀!

100蚊一碗燒鵝麵賣相就係咁喇,大家覺得值唔值呢?(何嘉麗call me GaGa fb專頁圖片)

怒火化成文字版,#憑乜嘢收加一,呢句好有共鳴喎!(何嘉麗call me GaGa fb專頁截圖)

究竟為乜咁嬲呢?就係話說叫咗碗100蚊嘅燒鵝麵,上到枱見到嘅燒鵝,鵝皮嘅唔同色明顯係來自唔同鵝,亦好明顯係師傅左一忽右一忽咁斬落嚟,拼拼砌砌咁上碟!「大佬,$100,你可能覺得唔係乜嘢錢,但係都請你尊重下我,俾返舊齊齊整整嘅肉我啦!」仲曲線咁讚師傅喎,「大大細細切頭切尾都可以砌到咁靚,,師傅刀法真係神乎其技!」

𡃁界未必知佢乜水,其實何嘉麗曾經係港台當紅DJ,同林珊珊、鄭丹瑞嘅《三個小神仙》係一個時代嘅經典!依家已經冇再開咪嘅嘉嘉,周圍飛周圍飲食,變咗旅遊達人!(何嘉麗call me GaGa fb專頁圖片)

計埋加一$123.2,嘉嘉俾咗130蚊!(何嘉麗call me GaGa fb專頁圖片)

呢個po一出就有網民話全行燒味佬都係咁切法喎,又話點解唔當場投訴要食完先po文出來呀……不過咁,留意返呢位前DJ嘅說法,「咁斬鵝就梗係拼砌㗎啦!你話。問題係呢啲擺到明就係啲肉頭肉尾,呢度一忽嗰度一片咁砌成!」佢話最氣頂嘅係咁樣做法好唔專重自己個老字號同埋食客喎!

呢位網友都好激動!(何嘉麗call me GaGa fb專頁截圖)

再嚟!仲要語氣好差吓喎!(何嘉麗call me GaGa fb專頁截圖)

搞到出埋新聞見埋報,鏞記發言人就對傳媒回應,話鏞記嘅燒鵝係以炭燒方法烹調,喺炭燒過程入面,即使同一隻鵝受熱程度都會唔一樣,燒鵝皮先有機會顏色唔同喎。而何嘉麗就似乎唔多接受呢個解釋喇,佢留言話「越解釋越亂」!

嘉嘉有來有往回應返網民留言㗎!(何嘉麗call me GaGa fb專頁截圖)

嘉嘉對於鏞記發言人嘅回應就咁表示喎!(何嘉麗call me GaGa fb專頁截圖)

其實鏞記係老字號兼燒鵝出名唔使多講,不過亦有唔少人對佢評價有相反意見,覺得鏞記近年嘅水準每況愈下,加上伙記服務態度非常麻麻,喺呢個講求CP值嘅年代,鏞記連食老本嘅資格都無,有網民仲話近年去鏞記幫襯嘅好大部份已經係陸客喇!

網友話嘉嘉唔識食就唔好扮食神,其實有邊個真係識食呀?(何嘉麗call me GaGa fb專頁截圖)

講返點解唔當場投訴嘅原因喎!(何嘉麗call me GaGa fb專頁截圖)

You may also like...

Leave a Reply

Your email address will not be published. Required fields are marked *