【TVB小花孖閨蜜旺角開店 手工鮮製意粉menu簡而精】FooDo

旺角食好西有好多選擇,不過有唔少都係過江龍或者連鎖店,想支持吓本地餐廳又有咩新選擇呢?今次小編就帶大家去TVB小花林秀怡同閨蜜拍檔開嘅手工闊麵餐廳FooDo,睇吓有咩正嘢!


餐廳走日本風簡約路線,色調以白色為主,簡潔明亮無印feel啦!

最近秀怡喺大台劇《是咁的法官閣下》演大律師一角好搶戲,仲被提名今屆最佳女配角頭輪入圍名單喎!又要拍劇又要兼顧餐廳,吃唔吃力呢?秀怡望住拍檔笑笑口:「睇本身拍劇工作忙唔忙啦,其實我比較少會喺度嘅,反而係婷芝(拍檔)就多啲喺餐廳。」。



曾經先後喺亞視同無綫工作過嘅婷芝,同秀怡喺TVB藝員訓練班認識,一齊係無綫打拼。婷芝一向都好鍾意煮嘢食,成日都會下廚宴請朋友,開餐廳嘅契機係因為朋友經常大讚佢廚藝了得,「唔開餐廳嘥晒!」。2年前離開大台,決定全力開餐廳!婷芝話:「喺電視台做咗咁多年都好似冇乜成績咁,最鍾意嘅嘢可能都係煮嘢食喎,所以膽粗粗放膽一搏。」雖然餐牌上選擇唔多,但婷芝就話Menu上每款都係精選,簡而精呀!

秀怡就話自己本身冇乜入廚經驗,開餐廳純粹因為「鍾意食」,而佢喺餐廳嘅時候多數會做樓面工作,大家得閒都可以去撞吓佢呀!

主打當然係手工闊麵啦,婷芝話每日都要不停咁搓粉、整麵,雖然用製麵機幫手,但其實人手製作依然佔大部分,搓粉、桿麵全部都係體力活,真係少啲力水都唔得呀!小編都係第一次睇製麵過程,好得意呀!大家想睇就要睇埋video喇!

最受歡迎係呢個忌廉汁自家製醃肉及日本生雞蛋配手製闊麵(HKD81)喇!雞蛋全部係日本可生食用雞蛋,品質上大家可以放心。忌廉汁偏creamy,配埋生雞蛋撈勻之後有種濃稠版卡邦尼嘅感覺;另外闊麵質地比一般闊麵厚身少少,但食落係有啲煙韌而唔係齋粉嘅感覺,咬落條條嘅質地都有少少唔同,質次感好豐富仲非常掛汁,果然係手工嘢,每條麵獨一無二!

除咗闊麵,菠菜葉、車打芝士及馬蘇里拉芝士手作薄餅(HKD81)亦好受歡迎。自家製醃肉食落有少少鹹,但又同薄餅個感覺幾夾,好似平時食pizza上面都會有勁鹹嘅辣肉腸咁,不過好在有用菠菜葉將口味中和返,成件事好match。餅底用薄批底,熱辣辣脆卜卜!

小食方面,小編試咗芝士烤焗雞塊(HKD36/4塊)。表面金金黃黃,但唔係煎唔係炸,而係焗㗎!烤焗呢種烹調方式比煎炸相對健康得多,因為唔使落咁多油吖嘛!咬落雞汁微微喺口腔入面爆開,幾咁Juicy!

最後食返個蛋糕埋尾啦,小編覺得呢個焦糖脆脆蛋糕(HKD40)相當吸引。除咗外表睇得,味道都相當唔錯。細Size兩個人食飽後Share都啱啱好!面頭嘅焦糖脆脆配蛋糕一脆一軟口感好正,唔試點得?

FooDo
地址:旺角通菜街1A-1L號威達商業大廈地下C號舖
電話:9016 6327
營業時間:星期一:12:00-15:30;18:00-22:00;星期三至日:12:00-15:30;18:00-22:00

You may also like...

Leave a Reply

Your email address will not be published. Required fields are marked *