【屯門素食薄餅小店 即焗雙拼Pizza足料香噴噴】素學堂

呢間薄餅專門店喺屯門好受歡迎,店名叫常嚐素,仲夠膽聲稱自己係全港唯一嘅素食薄餅店添!小店由趙生兩兄弟主理,點解開素店賣Pizza?唔多唔少都同本身係素食者嘅趙媽媽有關!話說趙生細細個同媽媽去街市,佢話見到檔口啲人劏魚又劏雞,見得多都覺得殘忍,於是慢慢就跟媽媽一樣食素喇!

趙生入行超過十年,先後喺多間大型薄餅店度做廚,最後決定自己開返間全素食嘅薄餅專門店,有堂食又有外賣服務!兩兄弟由打理店舖、諗新菜式、落單、聽電話到揸車送貨都親力親為㗎!唔怪得咁多街坊熟客支持。趙生仲話店名叫常嚐素係有意思㗎,就係希望多啲人嘗試去食素,咁就唔止身體健康啲,連皮膚都靚啲咁話喎!

店內提供15款薄餅,小編今次分別叫咗兩個雙拼普通批(HKD88),可以一次過試齊四種味呀!分別係海鮮總匯、世外桃園、日式芥辣風同照燒素鰻魚。即叫即焗,Pizza喺焗爐出嚟已經香噴噴喇!Pizza嘅麵粉會先用機器打,再用人手搓,食落特別香脆鬆軟。海鮮總匯口味係千島醬配素蝦、蟹柳、青椒、菠蘿同芝士,味道算濃郁,啖啖都有料放入口;世外桃園口味就係千島醬配水蜜桃、蘑菇、金菇、粟米同芝士,食落甜甜哋好清新。

輪到日式芥辣風即係Wasabi醬配素三文魚、蟹柳、粟米、素獅子狗、紫菜、芝麻同芝士。素三文魚係蒟蒻製品,喺顏色上點綴不少,薄餅落足Wasabi醬,一食落口搞到小編有啲標眼水,每一啖都好刺激;照燒素鰻魚就有照燒醬配蘑菇、素丸、青椒、素鰻魚、芝麻同芝士,用紫菜同大豆纖維做嘅鰻魚,像真度十分高,照燒醬汁令Pizza多咗日式風味,同香脆鬆軟嘅餅底又好夾啫!

除咗薄餅,都有其他主食!菠菜汁雜蔬焗飯(HKD44)雖然材料只係用西蘭花、粟米芯、蘑菇同粟米,但味道令小編好驚喜。菠菜汁用白蘆筍汁再加菠菜打勻,加埋芝士再放入焗爐之後,真係抵擋唔到誘惑呀!菠菜汁濃郁得嚟又有芝士香,配埋各類蔬菜就平衡返晒!


鮮茄素肉醬意粉(HKD42)都好特別!仲可以改用只喺用米嚟提煉,而唔含任何蛋奶成份嘅米芝­士(HKD6),適合純素人士,不過暫時就得呢個意粉有得轉米芝士,其他菜式用嘅芝士都係含蛋奶成份嘅澳洲進口芝士,如果純素素食者就要小心喇。小編都係第一次試米芝士,味道冇普通芝士咁濃郁,軟軟哋質感幾得意,但就無得拉絲啦!

小食選擇可以試馬來素雞串燒(HKD34/5串)素麥樂雞(HKD40/8件)。鹹鹹哋嘅素雞串燒估唔到係用蘑菇椗嚟做,質感嚡嚡哋好似食真雞胸咁,點埋甜酸汁真係味道一流!咪以為呢個係麥記嘅麥樂雞呀!望落真係勁似,但呢個係用大豆纖維做㗎,外脆內軟好快一件食一件呀!

羅宋湯(HKD10)有素肉,味道都算濃郁,但就同一般嘅羅宋湯冇太大分別。

 

常嚐素
地址:屯門井財街青棉徑5號金寶大廈地下7D號舖
電話:3488 0072
營業時間:星期一至日 :11:00 – 22:30

You may also like...

Leave a Reply

Your email address will not be published. Required fields are marked *