【養生火鍋銅鑼灣開旗艦店 限定蜜瓜響螺花膠鍋】老鍋台式火鍋

老鍋台式火鍋主打養生湯底,啱啱喺銅鑼灣開嘅第三間舖仲係旗艦店添。旗艦店當然會推出期間限定吸引大家啦,尤其係呢度先有嘅美顏蜜瓜響螺花膠鍋、手切本地肥牛、台灣豬血糕、紫淮山、鹹蛋黃炸魚皮同台灣手工啤。唔講咁多,即刻睇吓有咩正嘢先!

旗艦店増設兩間VIP房,可以容納8至18人,一班人傾得癲啲都冇有怕啦!

打邊爐叫鴛鴦鍋(以單點價中,較高價格計算)可以試唔同湯底,旗艦店一樣有四款招牌湯底 — 麻辣鍋、酸菜白肉鍋、美人鍋同養生鍋,小編就揀咗酸菜白肉鍋(HKD158/單點)美人鍋(HKD228/單點)。兩個鍋都好足料,酸菜白肉鍋有大白菜、五花腩同海量嘅寬粉,建議大家趁熱先食五花腩同寬粉,大白菜煮耐少少會有啲似淡味泡菜鍋。用杞子、南棗、金華火腿同烏雞煲成嘅美人鍋,建議大家先飲個湯潤吓喉,半隻烏雞煲耐咗都唔會好老,食埋就更加滋陰補氣喇!

旗艦店一定有限定款式啦,美顏蜜瓜響螺花膠鍋(HKD288)落足蜜瓜、沙參、玉竹、金華火腿、豬𦟌、雞腳、淮山、杞子同圓肉等材料,有滋陰補腎同去濕功效,男女都啱。不過呢款只可以單點,唔可以拼做鴛鴦鍋。

仲有呢四款食物都係旗艦店限定,手切本地肥牛(HKD228/小)肉質唔似平時嘅肥牛,厚身啲,更加有咬口。

台灣飛嚟嘅台灣豬血糕(HKD58)夠晒地道,好似糯米咁有咬口,本身冇咩味,但滾耐啲吸湯汁又幾好喎。

左邊紫淮山(HKD58)非常少見,滾1分鐘口感似蓮藕咁爽,滾耐啲3分鐘就開始粉粉哋,重點係有養顏功效呀!右邊係即炒嘅鹹蛋黃炸魚皮(HKD68),落單後大約等15分鐘,鹹蛋味唔算好突出,但炒到起沙嘅質感真係好正!魚皮炸得鬆脆,好似食薯片咁。

當然仲有唔少恆常款式值得試啦,美國特級牛肋肉(HKD218)好嫩滑,油脂唔重,食多幾件都唔怕滯。

仲有厚到好似件扒嘅皇室魚肚(HKD88/8件),每食一啖都覺得好似瞬間白滑咗咁,仲係吸湯汁佳品!

一品花雕醉雞件(HKD88)一上枱已經聞到陣陣酒香,花雕味都滲透晒入雞肉,因為滾熟之後仲食到陣酒味㗎。

手工丸拼盤(HKD108)一次試晒五款手打丸,最彈牙嘅係蝦丸,味道仲幾鮮甜。另外有梅菜豬肉丸、墨魚丸、芝士牛肉丸同流心鹹蛋豬肉丸。

鮮炸響鈴(HKD68)真係必食之選,質感薄脆唔油膩,放耐咗都依然脆口,size仲異常大件添。

菜係一定要食,仲可以食特別啲,例如左邊嘅台灣地道食品水蓮(HKD68),滾1分鐘就食得,幾爽口㗎;仲有功能蔬菜拼盤(HKD88),三個系列之中小編就試咗右邊嘅消脂系列,有羽衣甘藍、有機秋葵、台灣萵筍同蘆筍。其餘兩款係抗氧化系列,有南瓜、大紅蕃茄、黑雲耳同厚切日本山葯;高纖系列有杏鮑菇、日本金菇、蓮藕片、有機玉米同翡翠絲瓜。

想飲嘢清啲?店內每日以獨門秘方,新鮮煲嘅杞子杭菊露【右邊】(HKD28/杯,HKD88/壺),感覺清甜低糖;同埋微酸嘅沖繩黑糖烏梅汁【左邊】(HKD28/杯,HKD88/壺)

想豪情啲?有銅鑼灣旗艦店限定嘅台灣手工啤(HKD48-68/枝),有唔同節氣俾你揀,入面有啲仲攞過世界啤酒大賽獎項添。想用味道去揀可以試熱帶果香、烏梅同芭樂,呢啲都比較台灣口味。

 

老鍋旗艦店
地址:銅鑼灣駱克道 491 – 499號京都廣場 2/F全層
電話:2818 6678 / 51154762 (WhatsApp)
營業時間:星期一至日:11:30-15:00,17:00-01:00

您也許也會喜歡…

發表迴響

你的電子郵件位址並不會被公開。 必要欄位標記為 *